Në transmetimin maratonë të 20 vjetorit të “Opinion”, në studion e tij nuk mund të mungonte pronari i Televizionit Klan, Aleksandër Frangaj.
Përballë Artan Lames, me të cilin shpesh ka shkëmbyer replika për tema të ndryshme, Frangaj tregoi për studion e parë të “Opinion”, të cilën vetë gazetari Blendi Fevziu e cilësoi “kasolle”, për nga madhësia.
Një kasolle e cila, nga e tillë sot është bërë pallat i madh, tha Fevziu ndërsa solli në vëmendje emisionin e parë të mbajtur në ambientet e Televizionit Klan, ku në mesin e të ftuarve ishte Spartak Ngjela. Në atë kohë, duke komentuar kalimin e “Opinion” nga TVSH në Klan tha “të sollën nga pallati në kasolle”.
“Nuk kishte faj, në TVSH ishte një studio e madhe, ndërsa në Klan ishte një studio e vogël dhe gjëja më interesante është që kur panë drejtuesit e TVSH skenografinë e Klan e akuzuan se e kishte vjedhur”, tregoi Fevziu.
Ndërsa Frangaj shpjegoi se kishin kujtuar se skenografia ishte marrë fizikisht, pasi gjithçka ishte realizuar brenda një nate.
“Ajo ka qenë shumë interesante dhe është për t’u çuditur sesi është realizuar skenografia në harkun e një nate. Është marrë vendimi të shtunën në mesditë dhe të dielën pasdite ka qenë dekori gati për transmetim. Me dy kamera dhe në fakt s’kishte faj që thoshte kasolle. Aq sa ishte studio e “Opinion”, nuk kishte faj. Fillonim nga zeroja, në krahasim me një televizion disa vjeçar”.
“Problemi është që ne e filluam nga kasollja dhe kemi arritur në 7 studio të tilla, ndërsa TVSH e gjetëm me ato studio, po edhe sot janë po me ato studio”.
E duke folur për Televizionin Klan sot, Fevziu shfaqi në ekran edhe një përmbledhje të debateve ndër vite mes Frangajt dhe Lames. Debati vijoi edhe në studio, sigurisht i shoqëruar me batuta dhe humor.
