Policia e Dibrës ka vënë në pranga tre të rinj, pasi kanë kundërshtuar dhe goditur efektivët dhe iu është gjetur drogë.
Në kuadër të operacionit policor të koduar “Dobrova”, për kapjen e personave në kërkim, apo të atyre që qarkullojnë me armë zjarri pa leje, të atyre që mbajnë apo trafikojnë lëndë narkotike, shërbimet e Komisariatit të Policisë Dibër, kanë bërë arrestimin në flagrancë të shtetasve:
Olsi Toska, 24 vjeç;
Astrit Buci, 34 vjeç,
Altin Margjoka, 30 vjeç.
Arrestimi i shtetasve Astrit Buci dhe Altin Margjoka është bërë për kundërshtim dhe goditje të punonjësit të policisë pasi Astrit Buci, gjatë momentit të shoqërimit nga policia ka goditur dhe kundërshtuar punonjësit e policisë gjithashtu, edhe shtetasi Altin Margjoka ka ndërhyrë duke kundërshtuar dhe goditur punonjësit e policisë për mos shoqërimin në polici të shokut të tij shtetasit Astrit Buci.
Ndërsa shtetasi Olsi Toska është arrestuar pasi në momentin kur shërbimet e policisë kanë shkuar kontroll banese në shtëpinë e dajës së tij Astrit Buci, Toska është kapur në flagrancë duke dalë nga banesa me një kovë ku brenda saj kishte 0.5 kg lëndë narkotike canabis sativa e cila është sekuestruar në cilësinë e provës materiale.
Materialet procedurale i kaluan Prokurorisë Rrethit Gjyqësor Dibër për veprat penale “Prodhim dhe Shitje e lëndëve narkotike”, “Kundërshtim me dhunë i punonjësve të policisë”.
