Kryestrategu i Shtëpisë së Bardhë Steve Bannon ka sulmuar nacionalistët e bardhë duke i quajtur “kllounë”, ndërkohë që Shtetet e Bashkuara vijojnë të diskutojnë mbi protestat e dhunshme në Charlottesville.
I pyetur nga revista politike The American Prospect, nëse kishte një lidhje mes nacionalizmit ekonomik që Bannon mbështet dhe nacionalizmit të bardhë të shfaqur në protestat në Charlottesville, ai u shpreh se “etno-nacionalizmi” është humbës. Bannon e konsideroi si një element shumë të fryrë nga media e kërkoi që ata të ndihmojnë në mposhtjen e tij.
Kujtojmë se kryestrategu i Shtëpisë së Bardhë dikur udhëhiqte Breitbart News, një kanal i konsideruar si madhor për nacionalizmin. Sidoqoftë, Bannon e ka distancuar edhe më herët veten nga etno-nacionalizmi, duke thënë se interesimi i tij për këtë çështje rrjedh vetëm nga dëshira për të frenuar efektet negative të globalizmit.
Është ende e paqartë e ardhmja e Bannon në administratën Trump. Presidenti është nxitur ta shkarkojë kryestrategun, ndikimi i të cilit është parë në vendimet si tërheqja e Shteteve të Bashkuara nga akordi i Parisit për klimën. Sakaq, vetë Trump ka qenë në vëmendje të medias për përgjigjen e tij ndaj përplasjeve mes të djathtës ekstreme dhe anti-protestuesve në Charlottesville, ku ai fajësoi të dy palët për dhunën.
Tubimi i ndjekur nga neo-nazistët dhe supremacistët e bardhë erdhi në protestë për heqjen e statujës së Gjeneralit Robert Lee, i cili luftoi për Konfederatën pro-skllavërisë gjatë Luftës Civile Amerikane.
32-vjeçarja Heather Heyer mbeti e vdekur kur një mbështetës i të djathtës mësyu automjetin e tij në një turmë anti-protestuesish.
