Shpesh-herë trashëgimtarët e miliarderëve e ‘marrin jetën lehtë’, pasi shpresojnë se prindërit do ua kalojnë milionat atyre. Por jo në të gjitha rastet ndodh kështu. Miliarderët si Zukerberg apo Bill Gates pasurinë e tyre me shumë mundësi do e dhurojnë për bamirësi, të paktën referuar deklaratave të tyre në publik.
Bill dhe Melinda Gates kanë një pasuri që kap vlerën prej 89 miliardë dollarësh, por fëmijëve të tyre u japin vetëm një pjesë të vogël.
“Kjo do të thotë që ata të gjejnë vetë një mënyrë për t’ia dalë. Nuk është në favorin e fëmijëve tanë që ata të kenë shuma të mëdha. Kjo mund të shtrembërojë gjithçka që ata bëjnë”, është shprehur Gates gjatë deklaratave të tij.
Themeluesi i Facebook Mark Zuckerberg ka gjetur një tjetër mënyrë për t’i shpenzuar paratë. Ai së bashku me gruan e tij Priscilla Chan kur sollën në jetë vajzën e tyre të parë njoftuan se nuk kanë në plan t’ia lenë asaj paratë. Ata themeluan një organizatë për të ndihmuar në disa sëmundje ndërsa theksuan se 99% të aksioneve të Facebook do të shkojnë për këtë mision.
Bashkëthemeluesi i grupit Duty Free, 86-vjeçari, Chuck feeney, të gjithë pasurinë e tij e ka dhuruar për bamirësi, dhe teknikisht ai nuk është miliarder. Megjithëse fëmijët e tij nuk do të trashëgojnë miliona nga babi i tyre, e kanë kuptuar për vullnetin e tij të mirë. “Është e çuditshme, por ai na mbrojti nga njerëzit që mund të na trajtonin ndryshe për hir të parave. Kjo na bëri njerëz normal”, është shprehur vajza e tij./Scan
