Gjatë turit përgatitor që po zhvillon në Shtetet e Bashkuara të Amerikës, trajneri i Real Madrid, Zinedine Zidane ka qenë sot në takim me mediat. Kreu i kampionëve të Spnajës dhe të Europës ka folur në lidhje me të gjitha pikat e nxehta dhe zhvillimet e merkatos në kampin e Los Blancos. “Ata janë mirë, të lumtur të nisin turin, janë 10 ditë stërvitje dhe futbollistët duan të luajnë. Për ne kjo është ndeshja e parë, ndërsa për United është e katërta, gjithsesi ndjesia është pozitive”, u shpreh Zidane në prag të miqësores me Manchester United.
“Është e vërtetë që disa futbollistë shumë të mirë janë larguar ndërsa disa të rinj janë afruar, por ne tentojmë të përmirësojmë ekipin. Ne jemi të lumtur me futbollistët që sapo janë bashkuar me ne, ata duan të jenë me ne dhe të stërviten. Sezoni do të tregojë nëse kemi përmirësuar skuadrën. Largimi i Moratës është padyshim i hidhur, pasi e pamë se na dha shumë sezonin e kaluar. James Rodriguez i uroj më të mirën te Bayern dhe asgjë tjetër”, u shpreh Zidane në lidhje me largimet nga Real Madrid.
Në lidhje me shanset për të blerë Mbappe në këtë merkato vere, Zidane deklaroi: “Ne jemi me ata që sapo kanë mbërritur, ne jemi 28 dhe unë mendoj për futbollistët që kam në dispozicion. Si gjithmonë mund të ndodhë gjithçka… deri më datë 31 gusht. Futbollisti është i mirë, por unë mendoj vetëm për ndeshjen e nesërme dhe përgatis skuadrën për sezonin”.
