Vendimi i Këshillit të Ministrave për bllokimin e të gjithë tenderave deri në krijimin e qeverisë së re rrezikon të fusë vendin në prag epidemie. Pasojat më të mëdha po ndihen në sektorin e bujqësisë dhe mjedisit, ku edhe për shkak të temperaturave të larta, vendi rrezikon sërizisht shpërthimin epidemive. Specialistët kanë ngritur alarmin për dy sektorë të rëndësishëm sidomos në periudhën e verës që kanë të bëjnë me rrezikun e prhapjes së sëmundjeve njitëse te kafshët dhe mungesës së spërkatjes në zonat bregdetare.
Konfirmohet se Ministria e Bujqësisë për shkak të Vendimit të Këshillit të Ministrave nuk ka mundur të blejë ende vaksinat kundër dermatozes nodulare, brucelozes dhe plasjes. Të trija këto sëmundje janë të rrezikshme jo vetëm për kafshët, por edhe për njerëzit të cilët janë te ekspozuar me raste të tilla.
Alarmi për pragun e epidemisë vjen nga Drejtoritë e Bujqësisë së Beratit dhe Vlorës, të cilat nisur nga rastet e deritanishme kanë informuar se të paktën këto dy zona janë në prag epidemie. Sipas tyre, përmasat e kësaj situate mund të jenë të papërballueshme për një kohë fare të shkurtër, çka do e bënte të pamundur menaxhimin e pasojave. Dëmet do ishin të konsiderueshme jo vetëm tek kafshët dhe fermerët, por edhe tek njerëzit që mund të preken nga këto sëmundje.
Dezinfektimi i zonave ujore, plazheve, apo të mbjellave është një tjetër sektor që pritet të ketë pasoja nga bllokimi i tenderave me VKM. Fushatat e dezinfektimit bëhen në mënyrë të përvitshme në periudhën korrik-gusht, por këtë radhë edhe ky proces pritet të dështojë. Për shkak të vendimit bllokues të qeverisë janë ndërprerë të gjitha blerjet e dizinfektuesve, çka gjithashtu do të sjellë pasoja në këto fusha. Kjo VKM mund të kthehet në një boomerang për Kryeministrin në fushën e sigurisë ushqimore dhe shperthimin e epidemive, çka mund të sjellë pasoja në jetë njerëzore si dhe dëme të pallogaritshme në fushen e bujqësisë.
Boldnews.al
