Fundjavat gjatë sezonit të verës janë problematike për sa i përket trafikut në zonat bregdetare por edhe në autostradën Tiranë-Durrës. Policia ka paralajmëruar paraditen e sotme për një trafik të rënduar në disa prej zonave më problematike, ku edhe aksidentet kanë qenë të shumta. Vetëm gjatë orëve të para të paradites kanë ndodhur 4 aksidente rrugore.
Njoftimi i Policisë:
SHKODËR: Në të gjithë akset rrugore të qarkut Shkodër ka trafik normal të pandërprerë të mjeteve, nuk janë regjistruar aksidente dhe bllokime të trafikut në zonën e Velipojës.
Shërbimet e Policisë Rrugore dhe të shërbimeve të tjera janë vendosur sipas planizimit për sezonin turistik.
DURRËS: Në të gjithë akset rrugore të Durrësit ka trafik normal të pandërprerë të mjeteve, nuk janë regjistruar aksidente dhe bllokime të trafikut në zonën e plazhit të Durrësit sidomos në Gjirin e Lalëzit.
Shërbimet e Policisë Rrugore dhe të shërbimeve të tjera janë vendosur sipas planizimit për sezonin turistik.
Në ndihmë të shërbimeve të Qarkut Durrës në zbatim të planit të masave janë 5 punonjës të Policisë Rrugore Tiranë, ndërkohë që në zonën e Golemit në Kavajë janë planizuar për ditën e sotme dhe në vijim 6 punonjës të Policisë Rrugore Tiranë, të cilët monitorojnë trafikun në këtë zonë bregdetare.
Autostrada Tiranë-Maminas: Në orët e mëngjesit ka patur fluks të madh mjetesh nga kryeqyteti për në drejtim të Durrësit dhe të Gjirit të Lalëzit. Kanë ndodhur 4 aksidente me dëme materiale(përplasje mjetesh) dhe një aksident me pasojë plagosjen e një shtetasi.
Kryerja e veprimeve në këto aksidente ka shkaktuar vonesë të përkohëshme dhe bllokim të trafikut. Situata u përmirësua për një kohë relativisht të shkurtër dhe tani trafiku po rrjedh normalisht.
Ka shërbime të përforcuara në këtë segment rrugor të Policisë Rrugore dhe shërbime të tjera të Policisë Shtetit.
Lezhë- Fier – Vlorë: Në të tre qarqet e mësipërme nuk janë vënë re bllokime ose ngadalësime të trafikut gjatë mëngjesit të sotëm dhe në vijim deri në orët e drekës. Në të tre qarqet ka shërbime të përforcuara të Policisë Rrugore, të Policisë së Rendit dhe të FLO.
Edhe në brendësi të zonave turistike, plazhet e Divjakës, plazhet e zonave të Himarës dhe të gjithë bregut të jugut, Sarandës, të Shëngjinit janë nën kontroll normal të shërbimeve të Policisë Rrugore. Kjo është situata në përgjithësi nga mëngjesi i sotëm e deri tani.
Pasdite pritet rëndim i situatës dhe ngarkesë mjetesh në aksin rrugor Gjiri i Lalëzit – Mbikalimi-Maminasit si dhe në aksin Durrës -Tiranë. Shërbimet e Policisë Rrugore pas orës 16:00 do të përforcohen me të tjera shërbime shtesë për të përballuar flukset e kthimit dhe të hyrjes në Tiranë.
Policia Rrugore këshillon drejtuesit e mjeteve në rast fluksi në pasdite për kthimin në Tiranë nga Durrësi të përdorin edhe rrugë alternative nëpërmjet rrugës së Ndroqit dhe ditën e nesërme për ata drejtues mjetesh që kërkojnë të dalin nga Tirana për në Durrës dhe për të shkuar në destiancionet e Jugut të zgjedhin sipas rastit këtë segment rrugor alternativ.
Janë porositur Drejtuesit e Policisë Rrugore Durrës, Tiranë, Lezhë, Shkodër, Vlorë dhe Fier që në çdo rast të ndodhjes së aksidenteve rrugore me ose pa pasojë në këto akse rrugore si dhe të bllokimit të trafikut dhe të krijimit të radhëve të njoftojnë menjëherë me qëllim njoftimin në kohë nëpërmjet medias të drejtueseve të automjeteve për bllokimet e mundshme.
