Një gazetare në Rusi ka denoncuar në polici ikonën e futbollit Diego Armando Maradona, duke e akuzuar se ka tentuar të kryejë marrëdhënie seksuale pa pëlqimin e saj kur ajo i shkoi në dhomë për t’i marrë një intervistë. Argjentinasi 56-vjeçar i mohon akuzat dhe avokatët e tij thanë se gazetarja ishte zhveshur vetë, dhe kjo e kishte detyruar atë që të telefononte sigurinë e hotelit në Shën Pjetërburg, shkruan Panorama Sport.
Gazetarja Ekaterina Nadolskaia, 30 vjeçe, tha se ajo ndodhej në barin e hollit të hotelit kur ata kishin nisur të bisedonin. “I kërkova një intervistë dhe ai më ftoi në dhomën e tij”, tha ajo. Një mikeshë e saj e kishte shoqëruar deri lart, por ajo ishte larguar menjëherë, thuhet në detajet e dëshmisë së saj në policinë ruse.
“Maradona mbylli derën dhe në fillim nisi t’u përgjigjej pyetjeve të mia, pastaj nisi të më ngacmonte seksualisht”. “Ai tentoi t’i hiqte fustanin, por gazetarja kishte shpëtuar vetëm pasi kishte mbetur me të brendshme”, shkruan gazeta “Komsomolskaya Pravda”. Maradona “tentoi t’i hiqte fustanin dhe ia arriti qëllimit”, vijon më tej shkrimi. I zemëruar, Diego telefonoi sigurinë e hotelit.
“Tre njerëz më nxorën jashtë në korridor. Sendet e mia personale mbetën në dhomë. Telefonin ma morën dhe ma kthyen pas 3 orësh”, thotë gazetarja simpatike, e cila shton se “ndihmësi i Maradonës erdhi dhe më hodhi një kartëmonedhë 500 dollarëshe”. Gazetarja u ankua se ajo ishte detyruar që të qëndronte për tri orë e veshur vetëm më të mbathura në hollin e hotelit me pesë yje, përpara se t’i rikthenin rrobat.
Punonjësit e hotelit u përpoqën që ta largonin gazetaren, por ajo nuk pranonte të ikte pa ardhur policia. “Askush nuk më kërkoi një ndjesë. Maradona bëri atë që bëri dhe nuk u tregua një zotëri. Veprimet e tij mund të konfirmohen nga kamerat e hotelit”, shtoi ajo.
Ndërkohë që njerëzit e afërt të legjendës së futbollit, i cili ndodhej në Rusi për finalen e Kupës së Konfederatave, thanë se gazetarja i kishte shkuar vetë në dhomë dhe ishte nisur t’i zhvishej papritur. Sipas tyre, ai ndjeu se po i bëhej një kurth dhe më pas kishte telefonuar sigurinë.
