Rezultati paraprak i zgjedhjeve deri më tani tregon një humbje të thellë të Partisë Demokratike. I Vetmi qytet ku kjo parti rezulton forcë e parë është Kukësi, ndërsa në rang kombëtar paraqitet edhe forcë e tretë në disa qarqe. Për këtë rezultat ka folur edhe ish deputeti i Partisë Demokratike, Ilir Rusmaili i cili është shprehur se humbja e PD-së vjen si pasojë e marrëveshjes së 18 majit. “Marrëveshja ishte gjëma e Bashës.” – shkruan ai
Analiza e Rusmailit
“Disfatën më të madhe të këtyre zgjedhjeve e ka pasur në ofertën nacionale. Rama u bë timonier i Shqipërisë për shkak të ofertës së timonierit që i paraqiti shqiptarëve. Basha humbi për mënyrën se si e impostoi fushatën e vet. Marrëveshja e 18 Majit u konceptua masivisht si një marrëveshje okulte, jo transparente. Gabimi i madh i Bashës për këtë humbje që po pëson qëndron në faktin se nuk i shpjegoi shqiptarëve kush ishte qëllimi i vërtetë i marrëveshjes, kush ishte arsyetimi politik që qëndronte pas këtij bashkimi me të majtën. Ky bashkim u perceptua si një gjë e papërballueshme, e papëlqyeshme. Basha dështoi në shpjegimin e marrëveshjes dhe për pasojë mori këtë lloj vlerësimi te qytetarët. Rama ishte triumfator i marrëveshjes. I mjaftoi fakti që ta shpjegonte bashkëpunimin me role erotike. Përgjegjësia i mbetej Bashës ta shpjegonte. Marrëveshja ishte gjëma e Bashës.” – tha Rusmali.
