Fation Sinani, 40-vjeç, është ekzekutuar me pistoletë tip “Beretta” në banesën e tij, në rrugën “Ali Demi” në qytetin e Vlorës, mbrëmjen e së martës. Dy persona të armatosur dhe me maska, kanë trokitur në derën e 40-vjeçarit dhe sapo e ka hapur kanë shkrepur armët drejt tij.
Sinani ka humbur jetën, ndërsa autorët janë larguar me një automjet tip “Mercedes Benz” me targa gjermane, që u gjet i braktisur 500 m larg vendit të ngjarjes.
Forca të shumta policie kanë mbërritur në vendin e ngjarjes ku kanë bërë të mundur gjetjen e armës së krimit dhe automjetin tip “Benz” me targa gjermane.
Policia e Vlorës bën të ditur se ka arrestuar njërin prej autorëve të vrasjes së 40-vjeçarit Fation Sinani. Autori i dyshuar është Neritan Qeribani, rreth 42 vjeç, me të cilin po punohet për zbardhjen e ngjarjes.
Viktima e atenatit në banesën e tij në lagjen “Ali Demi” në Vlorë, Fation Sinani, 40-vjeç, ishte me origjinë nga Tropoja. Ai jetonte në Vlorë prej pesë vitesh dhe punonte në ndërtim ndërsa njihej si person pa probleme. 40-vjeçari nuk rezulton person i njohur nga policia, pasi sipas burimeve pranë uniformave blu, për të nuk ka asnjë precedent penal.
Policia konfirmon se po hetohet ne dy pista per vrasjen,ate te nje grindje te castit mes viktimes dhe autorit,ndersa nje tjeter piste eshte edhe ajo e ndonje ngjarje te vjeter apo hakmarrje ,ne kohen kur ka jetuar ne vendlindjen e tij ne Tropoje deri disa vite me pare.
Njoftimi i Policisë së Vlorës për vrasjen:
Rreth orës 22:10, në lagjen “Partizani” Vlorë pranë rrugës drejt Spitalit Rajonal, është vrarë me armë zjarri në banesën e tij shtetasi F.S., rreth 40 vjeç, i cili për pasojë ka gjetur vdekjen në vend.
Grupi hetimor ka shkuar menjëherë në vendngjarje duke kryer veprimet në lidhje me krimin e ndodhur.
Si rezultat i reagimit të menjëhershëm të policisë, në ndjekie të autorëve është bërë e mundur kapja dhe shoqërimi i njërit prej autorëve në dalje të lagjes “Partizani”, shtetasi: N.Q., rreth 42 vjeç, me të cilin po punohet për zbardhjen e ngjarjes.
Janë ngritur pika kontrolli në akset kryesore të qytetit me qëllim kapjen e autorit tjetër i cili ka mundur të largohet me shpejtësi duke përfituar nga errësira, pasi dyshohet se krimi është kryer në bashkëpunim.
Në vendngjarje, Policia ka sekuestruar armën e krimit- Pistoletë të llojit “Beretë”.
Ende nuk dihen motivet e ndodhjes së kësaj ngjarjeje por po punohet për zbulimin dhe sqarimin e tyre.
Vazhdojnë hetimet për sqarimin dhe dokumentimin e plotë të ngjarjes.
***
Shpërthen automjeti 150 m larg vendit të vrasjes
Pak minuta pas krimit në Vlorë ku mbeti i vrarë me armë zjarri 40-vjeçari Fatjon Sinani, ka ndodhur shpërthimi i një automjeti. Ngjarja ka ndodhur në një kohë kur zona ishte e rrethuar me forca të shumta policie. Automjeti tip Eksplozivi i ishte vendosur automjetit “Ford Focus” AA987 KP, në pronësi të E.I., 42 vjeç. Ende nuk dihet nëse shpërthimi ka lidhje me krimin që i mori jetën Sinanit në banesën e tij.
Policia për shpërthimin e automjetit:
Rreth orës 22:58, në lagjen “15 Tetori”, autorë të paidentifikuar ende i kanë vënë lëndë plasëse (shpërthyese) automjetit tip Ford Autoveturë me targë AA 987 KP.
Automjeti ka qenë i parkuar në një rrugë dytësore pranë Bashkisë së qytetit, në pronësi të shtetasit E.I., 42 vjeç. Si pasojë e shpërthimit mjeti është dëmtuar në pjesën e përparme.
Grupi hetimor ndodhet në vendngjarje duke kryer hetimet e mëtejshme në lidhje me sqarimin e rrethanave të këtij rasti.
