Helmut Kol, një prej personazheve politikë më të rëndësishëm të gjysmës së dytë të shekullit të XX ndërroi jetë dje. Karriera e tij politike është e lidhur ngushtë më rrëzimin e komunizmit në Europën Lindore dhe padyshim me mjaft ndikim në Shqiperinë e tranzicionit.
Helmut Kol erdhi në krye të Gjermanisë Perëndimore në vititn 1982, si një politikan pa emër të madh, por që në fund të karrierës së tij, më 1998, u bë kancelari më jetëgjatë në historinë e Gjermanisë. Ai qëndroi në detyrë më shumë se sa Bismarku dhe më shumë se sa Adenauri. Në Gjermaninë moderne ai konkuron me Adenaurin si një ndër njerëzit më të rëndësishëm të Gjermanisë. I zgjedhur katër herë rresht përmes zgjedhjeve të lira, Kol, u bë protagonist i rrëzimit të Gjermanisë Lindore dhe arkitekt i Bashkimit të Gjermanive. I ngulur përballë Portës së Brandenburgut, ai u përshëndet vetë me emigrantët e parë që kaluan për herë të parë pas 40 vitesh kufirin mes lindjes dhe perëndimit.
Ai u bë protagonist i bashkimit të shpejtë të Gjermanisë, duke bindur qytetarët që e kishin votuar të pranonin barazimin e markut gjermano perëndimor me atë lindor. Duke bindur Bashkimin Sovjetik të largonte trupat kundrejt një ndihme të madhe ekonomike dhe së fundmi, u bë vetë promotor i integrimit të lindjes me perëndimin. Kur u largua, më 1998, ai zgjodhi në krye të partisë së tij, një gjermano lindore, Angela Merkelin, duke u bërë shembulli konkret i besimit që dy gjermanitë që kishin jetuar për vite dy realitete të ndryshme, mund të bashkoheshin.
Kol ishte një ndër arkitektët e zgjerimit europian dhe europës së bashkuar. Imazhi i tij dhe i Presidentit Francez Miteran, kapur përdore në varrezën e Verdun, aty ku lufta dhe konflikti varrosi gati një milion gjermanë dhe francezë në luftën e parë botërore mbetet një nga ikonat e politikës së bashkëpunimit dhe marrëveshjes. Ai besoi tek auropa e bashkuar dhe zgjerimi. Ai iku nga kjo botë dje, me një vend të sigurtë në histori, dhe me një besim që po tronditet së fundmi, bashkëpunimi dhe paqa funksionon, ekstremizmi ka prodhuar vetëm konflikt.
Opinion.al
