Ish-kryetari i LSI-së Ilir Meta ka sulmuar kryeministrin dhe kryetarin e PS Edi Rama nga qyteti i Beratit gjatë fushatës elektorale.
Që në nisje të fjalës së tij, Meta u shpreh se nuk është LSI që ka hequr nga puna gra socialiste si Arta Dade për t’i zëvendësuar në parlament me persona me rekorde kriminale.
Ilir Meta u shpreh gjithashtu se Edi Rama gjeti vendin e gabuar për të sulmuar LSI-në nga Berati dy ditë më parë.
“Kush i hoqi gjitha ato gra për të çuar në parlament njerëz që i hapën Shqipërisë probleme të jashtëzakonshme. Ish bashkëkryetari im zgjodhi vendin më të gabuar për të hapur luftë, Beratin. Në krye të grupit të punës këtu ka ardhur një kumarxhi dhe përdor segmente të caktuara të policisë në Berat për t’i bërë presion qytetarëve. Këto i di Berati. Nuk ka patur gjunjë as Berisha i parë për të nënshtruar popullin e Beriati e jo më të kenë gjunjë këta që nuk mbajën dot as ekuilibrin e tyre. Natyrisht kur njeriu pi doping kujton se është i fortë”, tha Ilir Meta.
Më tej, Meta tha se policia e lidhur me drogën po kërcënon votuesit në Berat që të mos votojnë LSI-në. Madje, Meta hodhi dyshime se Rama përdor substanca të ndaluara.
“Kush pi doping mendon se është më i fortë, por zgjedhjet do tregojnë tjetër rezultat”, tha Meta. Ai i bëri thirrje policisë të mos i bëjnë presion qytetarëve.
Ai nuk nguroi t’i kthejë përgjigje edhe për çështjen e timonit Ramës.
“Që të jesh timonier duhet të kesh aftësi të ndryshme. Duhet të dish të frenosh. Sa për akuzat e timonit, ai ka patur Nikon aty. Nëse ia ka lëvizur njeri timonin të merret me Niko Peleshin jo me ne”, tha Meta
