Trajneri i ri i Zenit St. Petersburg, Roberto Mancini dëshiron të ribashkohet me sulmuesin Mario Balotelli. Tekniku italian ka draftuar një listë të shkurtër me objektivat e merkatos së verës, ndonëse është emëruar zyrtarisht në krye të klubit rus vetëm dy ditë më parë. Pikërisht në listën e hartuar nga Mancini qëndron edhe emri i sulmuesit Balotellit që supozohet të kryesojë sulmin e Zenit, pasi rilindi karrjerën e tij te Nice. Balotelli, kontrata e të cilit me Nice skadon në fund të muajit, shënoi 15 gola në 20 ndeshje të luajtura si titullar me klubin francez sezonin e fundit.
Mancini dhe Balotelli fillimisht punuan bashkë te skuadra e Inter Milan, përpara se trajneri 52-vjeçar të nënshkruante me sulmuesin, gjatë kohës kur drejtonte skuadrën e Manchester City në Premier League. Balotelli shënoi13 gola për City nën drejtimin e Mancinit, në sezonin kur fituan titullin kampion në Premier League në mënyrë shumë dramatike. Gjithsesi, Mancini do të duhet të përballet me konkurencën e disa klubeve europiane, që janë në garë për shërbimet e Balotellit, përfshirë Antalyaspor dhe Las Palmas.
