Flamur Gjuzi, drejtori i ALUIZNI-t në Durrës hedh poshtë të gjitha akuzat e ish-kryeministrit Sali Berisha për gazin lotsjellës të përhapur në godinën e institucionit që drejton.
I pyetur nga gazetarja Klodjana Haxhiaj, Gjuzi përgënjeshtron Berishën dhe thotë ndër të tjera se nuk ka ndërmend të japë dorëheqjen nga ky post.
“Jam në zyrë me të gjithë punëtorët e mi. Është e vërtetë që është ndjerë një erë nga jashtë. Era ishte rëndë dhe lajmërova policinë. Ndërkohë që i kërkova stafit të dalim jashtë për faktin se zyrat janë të vogla e të ngushta dhe godina e amortizuar. Nuk pasi asnjë lloj shqetësimi as për stafin”,- sqaroi ai për BalkanWeb.
Gjuzi sqaroi ndër të tjera se nuk është prekur asnjë dosje dhe i dha një mesazh ish-kryeministrit Sali Berisha.
“Zotit Berisha si ish-kryeminisër dhe si mjek i them se gëzojmë shëndet të plotë e të mirë. Nuk ka pasur gaz lotsjellës, nuk është vërtetuar asgjë nga policia. Arshiva ku janë dosjet nuk është e prekur. I bëj thirrje si simpatizant i LSI-së që të votojë edhe ai për ne më 25 Qershor”,- raporton ai për BalkanWeb.
Sa për aromën e rëndë që është ndjerë brenda zyrave të ALUIZNI-t, dyshohet të kenë ardhur nga ndonjë kanal i hapur, pasi dje Durrësi u përmbyt, por nuk përjashtohet as mundësia e gazit të rrjedhur në ndonjë prej kondicionerëve të katit të parë të godinës 6-katëshe. Sakaq policia ka nisur hetimet për ngjarjen.
Denoncimi i Berishës për sulm me gaz lotsjellës te ALUIZNI në Durrës, ja çfarë thotë policia
Te zyrat e ALUIZNI-n ne Durres personat e pranishem kane ndjere nje arome mbytes.
Si pasoje ata kane shfaqur probleme me frymemarrjen dhe probleme shendetesore.
Menjëherë në vendngjarje kanë shkuar Efektivet e Policisë, Forcat Zjarrëfikëse dhe ambulanca, me qëllim parandalimin e çdo nevoje emergjente.
Ndersa pak me pare ish-kryeministri Sali Berisha me ane te nje mesazhi qe i kishte derguar sipas tij qytetari dixhital shkruante se te ALUIZNI i Durrësit ka ndodhur një sulm me gaz lotsjellës, dhe akuzon Lefter Kokën bashkë me të birin që kanë hyrë aty e po grisin dosje.
Njoftimi i policise
Informacion paraprak.
Më datë 22.05.2017, rreth orës 15: 30 jemi njoftuar se në Zyrat e Aluiznit, Durrës personat e pranishëm kanë ndjerë një aromë mbytëse.
Menjëherë në vendngjarje kanë shkuar Efektivet e Policisë, ku disa persona kanë shfaqur shqetësime në frymëmarrje, por pa probleme për shëndetin.
Nga ana jonë është lajmëruar prokurori I gatshëm, Forcat Zjarrëfikëse dhe ambulanca, me qëllim parandalimin e çdo nevoje emergjente.
Situata në këto momente është normale dhe theksojmë se në ambientet e Spitalit Rajonal Durrës nuk është paraqitur asnjë person.
Është ngritur grupi hetimor dhe pritet të përcaktohet nga ekspertët lloji I lëndës e dyshuar e hedhur në këtë ambjent dhe zbardhjen e shkaqeve të ngjarjes.
