150 gram tritol u çaktivizua nga policia në një lokal në lagjen ‘Emin Matraxhiu’ në Elbasan mesditën e sotme. Pronari i lokalit të cilit i kishin vënë tritol është Besnik Braka i cili njihet edhe me emrin Nik Vojaçek. Ai rezulton i arrestuar në vitin 2015 pasi ka tentuar të korruptojë një gjyqtar në Durrës.
“Besnik Braka ose Nik Vojaçek është dënuar nga Gjykata e Durrësit për korrupsion aktiv ndaj gjyqtarit me 2 vjet burg në mungesë”, thuhej në njoftimin e Policisë në vitin 2015.
Ndërsa në vitin 2013, ai është ekstraduar nga Mynihu i Gjermanisë drejt vendit tonë nga Zyra Qendrore Kombëtare Interpol Tirana.
“U ekstradua shtetasi shqiptar Nik Vojaçek (i njohur edhe si Nik Braka – Besnik Braka), 48 vjeç, banues në Tiranë. Gjykata e Shkallës së Parë për Krimet e Rënda Tiranë, me vendim të datës 12.01.2009, e ka dënuar me 14 vjet burg për kryerjen e veprave penale të “trafikim armësh dhe municionesh”, “prodhim e shitje narkotikësh”, “prodhimit dhe mbajtje pa leje e armëve luftarake”, si dhe “falsifikimit të dokumenteve””, thuhet në njoftim.
Në vitin 2003, në kufirin me shtetin grek janë sekuestruar një sasi e madhe fishekësh luftarakë dhe në vitin 2004 është sekuestruar një sasi prej rreth 510 gr heroinë e një armë zjarri pistoletë, ku nga hetimet e kryera ka rezultuar se autor ishte i ekstraduari, Nik Vojaçek, thuhet ne nje njoftim te policise te atij viti.
