Gjatë natës së të enjtes, pikërisht përballë Koloseut, disa kalimtarë kanë gjetur të varur tre manekinë të veshur me fanelat e lojtarëve të Roma-s, konkretisht të Nainggolan, De Rossi-t dhe Salah si dhe një manekin pa uniformë. Një veprim makabër dhe provokues, i shoqëruar edhe nga një banderolë kërcënuese: “Një këshillë, pa ofendime, flini me dritën ndezur”.
Nuk është ende e qartë se cilët janë autorët e kësaj skene, me katër manekinë të varur, por ky nuk është një rast i izoluar. Në ditët që pasuan derbin e humbur 1-3 në shtëpi ndaj Lazio-s në fakt në sheshin Trigoria janë shfaqur vizatime kufomash me mbishkrimin “RIP”, bashkë me disa qirinj të vendosur në sfond. Ndërkohë Prokuroria e Romës është duke hetuar tifozët ultras që kanë kryer gjeste të tilla kërcënuese më parë ndaj lojtarëve të skuadrës verdhekuqe, me qëllim për të gjetur përgjegjësit e aktit makabër.
