Talenti shqiptar i Red Bull Salcburg, Mërgim Berisha, ka ngritur sot lart trofeun “Lenart Johanson”, pasi ka fituar Europa Youth League, atë që cilësohet si Liga e Kampioneve për akademitë e futbollit në kontinentin tonë.
Në finalen kundër Benfikës, Berisha ishte si zakonisht titullar me klubin austriak, i cili mbylli pjesën e parë në disavantazh por pastaj përmbysi gjithçka në 45 minutat e dyta falë Patson dhe Shmid për të fituar duelin me rezultatin 2-1.
Salcburgu, që kishte eliminuar ndër të tjera PSG, Atletiko Madrid, Mançester Sitin dhe së fundmi Barcelonën në gjysmëfinale, e mbylli turneun i pamposhtur në 9 ndeshje, ndërsa Berisha ishte një ndër futbollistë më të spikatur për austriakët. Sulmuesi regjistroi 7 gola dhe 4 asiste në këtë turne, duke u vlerësuar nga specialistët më të njohur ndërkombëtarë të cilët ndjekin rregullisht një aktivitet kaq prestigjioz.
Berisha ndiqet me vëmendje nga disa përfaqësuese, pasi për të kanë shfaqur interes përveç Shqipërisë edhe Kosova, Austria dhe Gjermania. Futbollisti, pak kohë më parë, deklaroi se nuk kishte vendosur ende se çfarë do të bënte për sa i përket të ardhmes në përfaqësimin ndërkombëtar./panoramasport
