Një aksident ndodhi mbrëmjen e djeshme në Vlorë në përfundim të ndeshjes së Champions League Barcelona-Juventus. Aksidenti ka ndodhur në rrugën kryesore Vlorë-Skelë, ku një makinë tip “Porsche Cayene” që drejtohej nga një 18-vjeçar me inicialet S.B. dhe që lëvizte me shpejtësi ka goditur fillimisht një automjet “Alfa Romeo” dhe më pas edhe 3 mjete të tjera duke i shkatërruar plotësisht.
Mësohet se automjeti “Porsche” ishte me targa serbe. Pavarësisht përplasjes së fortë nga aksidenti nuk ka të lënduar vetëm dëme materiale.
Shkak për aksidentin mendohet se është bërë lëvizja me shpejtësi të madhe e fuoristradës luksoze. Sipas burimeve të policisë drejtuesi i automjetit po hetohet ne gjendje të lirë për shkak të moshës ndërkohë që disa prej automjeteve të dëmtuara kanë qenë të parkuara dhe dëmtimi i ka nxjerrë jashtë përdorimit.
