Një video e publikuar dje bëri bujë në median online dhe çoi në reagimin e Policisë së Shtetit. Nënkomisar Arjet Jança i Policisë së Elbasanit u pezullua ditën e djeshme nga detyra deri në sqarimin e rrethanave të arrestimit.
Në video shihet momenti kur Jança i vë prangat 42-vjeçarit me inicialet Sh.Xh. teksa ishte në shoqërinë e gruas së tij.
Pasi videoja qarkulloi në rrjetet sociale, Jança jep edhe sqarimin e tij për ngjarjen:
“Personi që kam shoqëruar në video nuk është shoqëruar për arsyen që flitet. Ai ka qenë i dyshuar për përndjekjen dhe joshjen e një vajze 12 vjeçe. Në momentet e para e mitura e ka identifikuar si personin e dyshuar. Unë pas dëshmisë dhe identifikimin e saj, i cili ka qenë i momentit, kam bërë shoqërimin e të dyshuarit me mjetin e policisë dhe për këtë rast janë kryer veprimet hetimore që mbrëmë. Është marrë kallëzimi vajzës së mitur dhe deklarimi i personit të dyshuar. Unë kam bërë detyrën duke u ardhur në ndihmë qytetarëve, personat me makina luksoze që filmuan janë kontigjenti më i rrezikshëm i Elbasanit. Ata kanë patur përplasje me mua dhe herë të tjera. Ju dha mundësia të më filmojnë dhe disiformuan ju dhe publikun. Më keni vënë në vështirësi pa të drejtë para qytetarëve dhe familjes sime”, thotë Jança për JOQ e cila publikoi edhe videon që më pas u shpërnda gjerësisht në portale.
Ja çfare tha policia
Në lidhje me informacionin paraprak të dhënë nga Drejtoria Vendore e Policisë Elbasan për një video të publikuar në portale që bën fjalë për shoqërimin e një shtetasi ju informojmë se:
Në vijim të veprimeve paraprake të kryera nga Drejtoria e Standarteve Profesionale me urdhër të Drejtorit të Policisë Shtetit është pezulluar nga detyra oficeri i policisë pranë Drejtorisë Vendore të Policisë Elbasan Nënkomisar Arjet Jança, deri në përfundimin dhe sqarimin e plotë të çështjes. Ndaj oficerit ka filluar proçedimi disiplinor për veprime arbitare./Opinion.al
