Andrea Topi është babai i tre fëmijëve dhe fati i keq deshi që ai të rrisë i vetëm tre fëmijët e tij, pas një fatkeqësie. Enkelejda, bashkëshortja e tij, ka rreth 2 vjet që ka ndërruar jetë si pasojë e një sëmundjeje të rëndë e të pashërueshme, shkruan “Panorama”.
Ndërsa dy fëmijët e parë, Franko, 14 vjeç, dhe Stela, 11 vjeçe, janë fëmijë, të cilët gëzojnë shëndet të plotë, nuk ka ndodhur kështu me Xhesin, e cila është vetëm 8 vjeçe. “Lindi me probleme në gjymtyrë, me gjashtë gishta në duar dhe gjashtë në këmbë, si edhe me një tumor në gjuhë”, thotë Andrea.
“Ajo nuk mund të ecë dot vetë, nuk mund të ushqehet vetë. Xhesi është një fëmijë i dashur, edhe pse me aftësi shumë të kufizuara fizike ajo ka dhunti të veçanta, e njeh shumë mirë kompjuterin, i pëlqen muzika dhe i vetmi mik që i rri pranë është Roza, qeni i saj, të cilin ia ka dhuruar tezja e saj.
“Kam rreth tre vjet që e dërgoj çdo ditë në Qendrën e Autizmit në Elbasan, “Fluturo për Jetën”, ku Xhesi nën kujdesin e psikologëve përpiqet të mësojë diçka, si edhe të kryejë fizioterapi falas. Edhe pse Xhesi trajtohet çdo ditë te Qendra e Autizmit, Andrea Topi ka besimin se vetëm dy operacione do të bëjnë të mundur që Xhesi të ketë mundësi të ecë, por edhe të flasë.
“Për zërin dhe artikulimin e fjalëve ka nevojë për një operacion, si dhe me një ndërhyrje te tendinat e këmbëve do të mund të ecë vetë. Në kushtet që jam nuk mundem më të bëj asgjë. Kam dëshirën e madhe që të çoj në vend amanetin e bashkëshortes sime, e cila vdiq vetëm nga sikleti i vajzës. Ajo shpresonte se një ditë Xhesi do të mund të ecte vetë. Ndaj do t’i lutesha Ministrisë së Shëndetësisë, por edhe të gjithë atyre biznesmenëve që të më ndihmojnë që t’i mundësohet Xhesit një ndërhyrje kirurgjikale”, shprehet Andrea.
Burimi: Panorama
