Kryeministri Edi Rama postoi në profilin e tij në Facebook një deklaratë të Prof. Dr. Josef Weidenholzet, eurodeputet i Austrisë dhe zv/President i Socialistëve e Demokratëve Europianë, ku thuhej se “të kërkosh sot, dy muaj para zgjedhjeve që ato të shtyhen e akoma më shumë, nën preteksin e “zgjedhjeve të lira” të kërkosh një “qeveri teknike”, do të thotë të rikthehesh disa vite pas”. Rama e shoqëron postimin me pyetjen: Kush gënjen?! Duket se liderët e politikë janë vënë në garë se kush ka më shumë mbështetës të huaj. Gjithashtu kemi vene edhe se dhe në çadrën e protestës ftohen nga Basha shumë politikanë të huaj që mbështesin kauzën e opozitës për qeveri teknike e zgjedhje të lira.
Më poshtë qendrimi i Josef Weidenholzet, publikuar nga Rama
Shqipëria ndodhet në metrat e fundit drejt finishit në integrimin europian. Këto katër vite kanë qenë tejet të rëndësishme në përmbushjen e agjendave të saj europiane. Ne presim që kjo rrugë e nisur e cila s’ka qenë aspak e lehtë për të mbërritur deri këtu të vazhdojë, sepse frutet e saj i pret me padurim një popull i tërë që të ardhmen e tij e sheh vetëm në integrimin e plotë në familjen europiane.
Të kërkosh sot, dy muaj para zgjedhjeve që ato të shtyhen e akoma më shumë, nën preteksin e “zgjedhjeve të lira” të kerkosh një “qeveri teknike”, do të thotë të rikthehesh disa vite pas. Sepse Shqipëria, ka disa vite që ka treguar se është në gjendje të kryejë zgjedhje të lira dhe për këtë, nuk i ka munguar kurrë ndihma e ndërkombëtarëve.
Unë ju bëj thirrje forcave politike të mos vendosin në kandar të ardhmen e vendit por t’ja lënë në dorë popullit, në datën 18 Qershor, ta vendosë se kush do e drejtojë në katër vitet e ardhshme”, ishte deklarata e eurodeputetit austriak Josef Weidenholzet e postuar nga kreu i qeverisë.
