Një grabitje me armë zjarri ka ndodhur në orët e para të mëngjesit të sotëm në Fushë-Prezë të Tiranës. Katër persona të armatosur dhe të maskuar kanë hyrë në ambientet e një biznesi, dhe pasi kanë kanosur rojet e policise private, kanë arritur të marrin një shumë monetare prej 70.000 lekësh (të reja). Policia private ka njoftuar policinë e Tiranës rreth orës 04.23.
Njoftimi i policisë së shtetit
Më datë 06.04.2017, rreth orës 04:23, ka ardhur një telefonatë tek Nr. 112, nga salla operative e një firme Sh.P.S.F.-je (polici private), se në Fushë Prezë, tek një firmë kanë hyrë 4 persona të armatosur.
Menjëherë janë nisur shërbimet e policisë ku kanë marrë kontakt me rojet e kësaj firme të cilët kanë deklaruar paraprakisht se:
Katër persona, ku dy prej tyre dyshohet të kenë qënë të armatosur kanë hyrë brenda rrethimit. Personat e armatosur kanë arritur të neutralizojnë rojet, ndërkohë që dy personat e tjerë, kanë kontrolluar zyrat e kësaj firme.
Këta shtetas kanë arritur të marrin një shumë monetare prej 70.000 lekësh.
Grupi hetimor po punon për identifikimin dhe kapjen e autorëve të kësaj ngjarje.
