Nga dita në ditë po rritet edhe më tepër tensioni mes PS dhe LSI, kjo në kuadër të fushatës zgjedhore, Teksa sot ish Ministri i Brendshëm Saimir Tahiri e kritikuar LSI, për mos pjesëmarrjen në zgjedhjet vendore të Kavajës, si kundërpërgjigje ndaj tij, ka ardhur menjëherë një deklaratë e deputetes së LSI-së Kjedi Mehmetaj.
Mehmetaj tha se habitet që këta njerëz nuk ndiejnë pendesë që sovrani po bën zgjedhje të parakohshme pasi oferta e mëparshme kishte qenë krimi e dhuna.
“Po dëgjoja sot njerëz që sajojnë foltore rrugëve të Tiranës e Paskuqanit, se e vuajnë shumë mungesën e foltores në parlament, të thoshin se do të respektonin të drejtën sovrane të popullit për të zgjedhur, habitem si nuk ndjejnë ndopak pendesë që sovrani po bën zgjedhje të parakohshme pikërisht se oferta e mëparshme kishte qenë krimi dhe dhuna. Sot pra të mos bëhemi arrogantë, e as hipokritë, të ulemi me këmbë në tokë e të mendojmë ç’po bëjmë e ç’do bëjmë për shqiptarët e mbi të gjitha për fëmijët tanë”, është shprehur Mehmetaj.
Nga foltorja e parlamentit ajo ka deklaruar se: “ndërkohë që u themi fëmijëve se nuk duhet të kryejnë krime, u servirim atyre modelet se si të inkriminuar janë pjesë e qeverisjes qendrore dhe lokale”, duke iu referuar këtu pikërisht ish-kreut të Bashkisë Kavajë Elvis Rroshi.
Lidhur me kanabisin, Mehmetaj përgëzoi qeverinë për projektin më të fundit për ta luftuar, duke përfshirë edhe ushtrinë, një propozim ky sipas saj i ardhur nga LSI-ja.
“Ndërkohë që sipas të gjitha të dhënave zyrtare dhe jo zyrtare, mbjellja e kanabisit në Shqipëri është rritur në mënyrë eksponenciale, qeveria më në fund reflektoi dhe e përgëzoj për marrjen e masave kundër mbjelljes së kanabisit në vend. Më vjen mirë që iu larguam justifikimit se shqetësimet e ngritura janë për arsye elektorale, sepse si rrjedhojë e mungesës së luftës kundër kanabisit sot fëmijët e të rinjtë shqiptarë janë drejtpërsëdrejti të ekspozuar ndaj konsumit të hashashit dhe kultivimit të tij”, është shprehur në fjalën e saj në Parlament Mehmetaj.
Kujtojmë që dje nga një takim në Paskuqan, Tahiri sulmoi ashpër LSI-në duke thënë se për ca vota më shumë dalin në lajme dhe shajnë PS. /opinion.al
