Ambasadori amerikan Donald Lu ka ritreguar një ngjarje të rëndë të ndodhur në Indi, më 16 dhjetor të vitit 2012 teksa ishte prezent në një ekspozite pikture në Tiranë.
“Gjashtë burra përdhunuan dhe rrahën për vdekje një vajzë 23-vjeçare që studionte për tu bërë fizioterapiste. Një histori tragjike e luftës për mbijetesë të vajzës, brenda një shteti me paragjykime, që fajtore nxirrte gjithmonë gratë.
Mjekët u munduan ta mbanin në jetë të renë Jyoti Singh, por pavarësisht trajtimeve të veçanta, edhe në Singapor, 23-vjeçarja indiane nuk mundi të mbijetojë.
Megjithatë, historia e saj e dhimbshme shërbeu për një kauzë të madhe, atë të miratimit të ligjeve të ashpra kundër dhunës seksuale ndaj grave. Por mbi të gjitha, atë të ndryshimit të mendësisë së krijuar, se gratë nuk janë fajtore, por viktima të dhunës.
Pak para se të vdiste – rrëfeu ambasadori Lu- vajza 23-vjeçare kërkoi të flasë me mediat, duke thyer kështu një tabu e duke dalë hapur për të treguar historinë e saj.
“Pas kësaj, qindra mijë protestues u mblodhën para zyrës së Kryeministrit në Indi për të kërkuar drejtësi. Qeveria u përgjigj duke dërguar ligjin kundër dhunës seksuale. Sot India e ka këtë ligj. E gjithë kjo ndodhi për shkak të një vajze të guximshme që vendosi të mos ishte e heshtur. Pata mundësinë të takohem me prindërit e një vajze që qeveria vendosi t’i jepte Çmimin e Gruas së Vitit. Ishte një takim që nuk kam për ta harruar sepse prindërit ishin po aq të guximshëm sepse ata donin të siguroheshin se vdekja e vajzës së tyre kishte shërbyer për diçka. Të gjithë ne duhet të dalim në mbrojtje të grave dhe vajzave dhe të kundërshtojmë diskriminimin. Si baba i një vajze më lejoni të përgëzoj rrjetin për punën që po bën për të kapërcyer dhe ndihmuar gratë e vajzat për të qenë të guximshme”, tregoi kryediplomati amerikan në vendin tonë.
