Kryeministri Edi Rama është duke zhvilluar një vizitë zyrtare në Gjermani ku është takuar meMinistrin e Jashtëm gjerman, Sigmar Gabriel. Sipas zyrës së shtypit të Kryeministrit, ai ka marrë vlerësim për reformat integruese dhe garanci për vazhdimin e mbështetjes së fortë për anëtarësim në Bashkimin Europian.
Pas takimit, ministri i Jashtëm Sigmar Gabriel është shprehur se “në prag të proceseve zgjedhore e dimë që reformat nuk janë të thjeshta, por ama shumica e shqiptarëve dëshirojnë stabilizimin dhe avancimin e mëtejshëm drejt BE-së. Shqipëria ka mundësinë e madhe historike që t’i bashkohet Bashkimit Europian, por, nga ana tjetër, edhe Europa ka mundësinë të bashkëpunojë me Shqipërinë dhe vendet fqinje të saj për paqen e stabilitetin”.
Nga ana tjetër, Rama mësohet se ka deklaruar se “jam mirënjohës Gjermanisë për reformën themelore në drejtësi, ku falë mbështetjes suaj dhe mbështetjes së partnerëve të tjerë, ne jemi në një proces shumë të avancuar. Shpresojmë shumë që të jemi në lartësinë e sfidës, për të filluar zbatimin e reformës përmes Vettingu-t të gjyqtarëve dhe prokurorëve. Ashtu sikundër kërkohet dhe mirëkuptohet në rekomandimin e Komisionit Europian, për të mundur pastaj që të çelim negociatat me BE-në”.
