Pas propozimit të nismës së drejtorit të Institutit për Studimin e Krimeve të Komunizmit, Agron Tufa dhe anëtarit të PD në AMA, Erald Kapri, ka shpërthyer skenaristi Alion Çaçi.
Çaçi i revoltuar thotë se refuzon që fëmijët e tij të mos kenë mundësinë të njohin rolet e Robert Ndrenikës, Kadri Rroshit apo filmat e Dhimitër Anagnostit e aktorëve të tjerë të mëdhenj shqiptarë.
Sipas tij kjo formë veprimi që po përpiqet të zbatojë Autoriteti i Medias Audiovizive është më diktatoriale sesa diktatura prej të cilës ajo pretendon të na mbajë në hije.
Statusi i plotë i Çaçit në facebook: Filmat shqiptarë të para ’90-s janë nga pasuritë më të vyera që kemi
Dikush tek AMA ka propozuar ndalimin e transmetimit në televizon të filmave shqiptarë që janë prodhuar në kohën e diktaturës me pretendimin se janë një propagandë e keqe e asaj periudhe.
Aso kohe, Kinostudioja “Shqipëria e Re” prodhonte 24 filma në vit, pra 2 filma në muaj. Tani nuk prodhohen as 2 në vit sepse buxheti është shumë i ulët duke qenë se pjesën më të madhe të lekëve në fillim na i vodhi pastaj ia dhuruam si dëmshpërblim Fullanit & friends.
Ata filma na kanë njohur me aktorët, regjisorët, skenaristët etj, më të mirë që ka pasur vendi. Për të vetmen arsye se ata zgjidheshin me audicione reale, me meritë kush ishte më i talentuar, me arsimin e duhur nga shkolla e duhur që dikur funksiononte shumë mirë dhe prodhonte artistë, jo njerëz që dalin nga shkolla më pak të ditur seç kanë hyrë (përjashtojmë raste).
Filmat shqiptarë të para ’90-s janë nga pasuritë më të vyera që kemi.
Mendoj se mjafton një intelekt normal për të kuptuar se çfarë ishte e drejtë dhe çfarë ishte e gabuar në atë regjim, nuk ka nevojë të na i bëni ju fakt të kryer me ligj.
Kur lartmadhnia e tij, Lord Ed Rama, hapi Bunk’Art-in, tha se e bëri me qëllim që populli të njoh horroret e atij regjimi. Pra, që ne të gjykojmë vetë. Kurse këta mendjendriturit e tjerë duan të na zhdukin nga faqja e dheut një nga degët më të bukura të artit që ky vend ka zhvilluar ndonjëherë.
Unë refuzoj që fëmijët e mi të mos kenë mundësinë të njohin rolet e Robert Ndrenikës, Kadri Rroshit apo filmat e Dhimitër Anagnostit e me radhë.
Kjo formë veprimi që po përpiqet të zbatojë AMA është më diktatoriale sesa diktatura prej të cilës ajo pretendon të na mbajë në hije.
Erald Kapri i PD: Të ndalohen filmat e komunizmit në ekranet shqiptare
Dëgjova me shumë interes në media mbi propozimin e shkrimtarit dhe kreut të Institutit të Studimeve për Krimet dhe Pasojat e Komunizmit, z Agron Tufa për ndalimin në ekranet shqiptare të filmave të komunizmit.
E mbështes fort këtë ide dhe besoj se shfaqja e tyre pa asnjë kriter në media është një dëm publik, një propagandë që shpesh paraqet regjimin komunist si “si jo dhe aq të keq”.
Si anëtar i Këshillit të Ankesave në AMA do nis hapat institucionale për një vendimarrje për ndalimin e plotë të tyre, ose të shfaqes në një orar të caktuar dhe në mënyrë të paralajmëruar. Fëmijët dhe të rinjtë nuk duhet të shohin filma mediokër që promovojnë “njeriun e ri”.
Në asnjë vend të Europës Lindore e aq më tepër në Gjermani apo në Itali nuk shfaqen filma apo dokumentarë të ish diktaturave. Kjo duhet të zbatohet edhe në Shqipëri. Personalisht, si studiues i periudhës së luftës dhe instalimit të diktaturës, kam ndjekur me interes çdo film apo dokumentar të diktaturës komuniste në Shqipëri dhe pothuaj të gjitha i gjen sot në youtube. Ndokush që ka interes i gjen onlinë, por dhënia e tyre në ekrane nuk është aspak legjitime.
Shpresoj të gjej mbështetje në këtë iniciative, nga vetë mediat të cilat ndoshta nuk kanë interes pasi mbushin orarin me këto filma që i blejnë për disa qindarka, nga gazetarët, studiuesit, shoqatat e ish të përdjekurve dhe shoqërisë shqiptare.
/Opinion.al
