Protestuesit po e kalojnë natën të shtrirë në trotuar para Ministrisë së Energjisë. Ata udhëtuan në këmbë nga Zharrëza e Fierit në Tiranë por ende nuk kanë marrë zgjidhjen e duhur për shtëpitë e shembura. Kanë takuar sot zv.ministrin Niko Peleshi, i cili u ka premtuar zgjidhje, por banorët shprehen mosbesues pasi qeveria i ka mashtruar edhe herë të tjera.
Në takimin 3 orësh që patën me zv.Kryeministrin Niko Peleshi dhe zv.ministrin e Ministrisë së Energjisë dhe Industrisë Ilir Bejta, banorët e Zharrëzës thonë se morën garanci se do të dëmshpërblehen në masën 100 përqind.
Por vetëm fjala nuk u ka mjaftuar banorëve të Zharrëzës. Ata vendosen të qëndrojnë para Ministrisë deri në daljen e draftvendimit të Qeverisë për dëmshpërblimin e tyre.
Ndërsa, Peleshi ka deklaruar se “do të ndalojmë injektimin e ujit teknologjik në puset e zonës gëlqerore të Zharrëzës, të cilat banorët mendojnë, por edhe ne kemi dyshime të arsyeshme të furnizuara nga Instituti i Gjeoshkencës, që mund të jenë shkaku i lëkundjeve. Do të kemi sistemim të përkohshëm derisa të dëmshpërblehen, rindërtohen apo të riparohen shtëpitë në mënyrë të plotë”.
Peleshi tha se vijimi i protestës është i pakuptimë pasi Qeveria do t’i japë një zgjidhje përfundimtare këtij problemi.
Pasi kanë dalë nga takimi me Peleshin, banorët e Zharrëzës kanë vazhduar protestën. Pasdite tentuan të ngrenë një çadër para Ministrisë së Energjisë por u ndaluan nga policia, ndaj po e kalojnë natën jashtë pas një udhëtimi të lodhshëm….
/Opinion.al
