Policia është vënë në kërkim të dy persova të tjerë lidhur me grabitjen e dy autoblindave të bankave në Qafë Kashar. Deri tani bilanci është pozitiv për policinë me 4 të arrestuar dhe gjetjen e një sasi të madhe karmonedhash që dyshohet se u përkasin pikërisht bankave të grabitura. Aktualisht puna është përqendruar për kapjen e shtetasit Admir Murataj (Lika) që dyshohet se është edhe koka e bandës si dhe një personi tjetër që deri tani i dihen vetëm inicialet A.Ç.
Gazetarët e ftuar mbrëmë në emisionin Opinion, Flamur vezaj dhe Spartak Koka dhanë detaje për Muratajn, i cili e ka ndryshuar mbiemrin pasi më herët e ka patur Lika.
Ata thanë se Admir Murataj është pjesë e ish-bandës së Ilir Kupës, shqiptarit që u arratis nga burgu grek. Admir Murataj ka përvojë në grabitjet e bankave, pasi një gjë të tillë e ka bërë edhe në shtetin fqinj, Greqi. Ai akuzohet nga drejtësia greke për grabitjen e një banke në Larisa.
Murataj ka qenë gjithashtu edhe pjesë e bandës së “Babagjyshëve” të cilët grabitën argjendarinë në një qendër tregtare në Tiranë në dhjetor të 2014-ës. /Opinion.al
