Avioni i Ishmit, piloti italian Guido Guidi ikën nga Shqipëria, lë peng 10 mijë euro

Pesë muaj pas rënies së një avioni në Ishëm, prokuroria nuk ka mbyllur ende hetimet. Piloti italian Guido Guidi lihet i lirë të largohet nga Shqipëria, por me kushtin që sa herë ta thërrasin autoritetet hetimore ai të paraqitet në Shqipëri. Gjykata e Krimeve të Rënda vendosi sot masën e ndalimit “garanci pasurore prej 10 mijë euro” ndaj pilotit Guidi, derisa hetimet ndaj tij të përfundojnë. Pra atij i është kthyer pasaporta dhe mund të lëvizë lirshëm, dhe si peng ka lënë 10 mijë euro. Vendimi u dha pas kërkesës së Prokurorisë, e cila po kryen veprime hetimore për të zbardhur shkaqet e fluturimit nga Italia në Ishëm të avionit “Piper” mesin e shtatorit 2016. Ai u dyshua për trafik droge, të mbetur në tenativë, akuza që deri tani nuk janë provuar.