Kryeministri i Shqipërisë, Edi Rama është ndalur edhe njëherë ditën e sotme në profilin personal në facebook në lidhje me çështjen e lirimit nga burgu të Lulzim Berishës, i akuzuar për vrasje dhe trafik droge.
Rama u ka kthyer përgjigje debatuesve të ndryshëm në profilin e tij, në lidhje me letrën e punësimit të Lulzim Berishës, të lëshuar nga kreu i Bashkisë Durrës, Vangjush Dako.
Kryeministri, ndër të tjera, ka replikuar me të gjithë ata komentues në facebook, të cilët i kërkuan sqarime pse Bashkia e Durrësit doli garant për punësimin e tij.
Rama theksoi me të madhe, se Lulzim Berishën, nuk e liroi nga burgu Vangjush Dako, por gjykata.
Ai bëri me dije se pretendimet se kryebashkiaku i Durrësit ka gisht në lirimin e ish-kreut të Bandës së Durrësit janë shpifje që i sajon Partia Demokratike.
Me sa duket, reagimi i kryeministri Rama, ka ardhur menjëherë pas një komenti të lënë në profilin e tij, ku i bëhej me dije: dëshira për ta bërë këtë vend duhet të jetë reale dhe jo duke bërë shoë, ku e ke Lulzim Berishën, një vrasës që e nxjerrin nga burgu me ceremoni dhe e presin si hero dhe tjetrin në Sarandë që i çoni policin si kofini pas të vjelit. Kështu nuk të fut njeri as në Afganistan dhe më në Europë, duhet të presim dhe shumë?.
Rama bashkangjit, fjalën e tij, duke theksuar: Lulzim Berishën e nxorrën nga burgu gjykatësit dhe Lulzim Bashës që të tregon ty përralla me gogolin e qeverisë, thuaji si ka mundësi që e mban bllokuar vettingun për ata gjykatës dhe nuk e hap hiç gojën kundër tyre, po shif për kryetarin e Bashkisë së Durrësit sikur e ka fajin ai që doli Lulzimi tjetër nga burgu?! Kështu që nëse e do aq shumë SHQUP-in sa të të marrin për budalla është e drejta jote, po nëse s’do që të të marrin për budalla atëherë kuptoje që fajin e kanë gjykatësit jo gogoli.”
Menjëherë pasi u mor vendimi për lirimin e ish-kreut të bandës së Durrësit, Lulzim Berishës, erdhi edhe reagimi i ambasadorit amerikan Donald Lu, i cili theksoi se lirimi i tij nga gjykatat e korruptuara ishte i papranueshëm.
“Birn” dhe “Zëri i Amerikës” publikuan pak ditë më parë të plotë vendimin e lirimit të Lulëzim Berishës, i njohur si kreu i Bandës së Durrësit.
Ndërkohë që për lirimin e të fortit të Durrësit, ishin akuzuar vetëm gjykatat me sa duket, gisht në këtë lirim ka patur edhe Bashkia e Durrësit.
Vetë kryebashkiaku Vangjush Dako, i drejtohej gjykatës për lirimin e Lul Berishës. Ai shkruan në një dokument të bashkangjitur vendimit, se Lul Berisha e ka familjen në një gjendje të vështirë ekonomike.
Prokuroria e Durrësit ka nisur hetimin kryesisht për veprën penale të “Shpërdorimit të detyrës” lidhur me praktikat gjyqësore, gjithashtu edhe për praktikat administrative të ndjekura nga ana drejtuesve të Bashkisë së Durrësit, në bazë të të cilave është vendosur me lirimin me kusht të të dënuarit Lulëzim Berisha.
Replikat e Ramës me komentuesit
KOMENTUESI: Dëshira për ta bërë këtë vend duhet të jetë reale dhe jo duke bërë shoë, ku e ke Lulzim Berishën, një vrasës që e nxjerrin nga burgu me ceremoni dhe e presin si hero dhe tjetrin në sarandë që i çoni policin si kofini pas të vjelit. Kështu nuk të fut njëri as në Afganistan dhe jo me në Europë, duhet të presim dhe shumë.
EDI RAMA: Lulëzim Berishën e nxorrën nga burgu gjykatësit dhe Lulëzim Bashës që të tregon ty përralla me gogolin e qeverisë, thuaji si ka mundësi që e mban bllokuar vettingun për ata gjykatës dhe nuk e hap hiç gojën kundër tyre, po shpif për kryetarin e bashkisë së Durrësit sikur e ka fajin ai që doli Lulzimi tjetër nga burgu?! Kështu që nëse e do aq shumë SHQUP-in sa të të marrin për budalla është e drejta jote, po nëse s’do që të të marrin për budalla atëhere kuptoje që fajin e kanë gjykatësit jo gogoli
KOMENTUESI: Më vjen keq që me drejtohesh si të jem një kamikaz i PD-së, po të shkruaj si një njëri i cili para tre vitesh të mbeshteti ty dhe si kryeministër dua që ky vend i mrekullueshëm që kemi në thonjëza (i mallkuar) nga politikanët tanë një ditë të jetë i njëjtë me vëndet europiane. Kurse për PD-në juve i keni në parlament e ku ta di unë, atyre tregojani dhëmbët jo mua. Gjithë të mirat.
EDI RAMA: Nuk të thashë je kamikaze, të thashë mos i dëgjo se të bëjnë për budalla dhe u nisa nga çfare shkruajte që është fiks ajo që thonë ata! Ndërsa sa për vendin nuk është aspak i mallkuar dhe edhe falë mbështetjes tënde ne po e ndryshojmë dita-ditës, hap pas hapi, sepse nuk bëhen dot në tre vjet çfare s’u bënë në 25 apo jo?! Ka ende shumë për të bërë, por besim, kurajo dhe punë punë punë, jo llafe në hava! Respekt
