Presidenti i zgjedhur i Amerikës mblodhi ditën e djeshme në ‘Kullën Trump’ në New York shefat ekzekutiv të kompanive më të mëdha të teknologjisë.
Ai mirëpriti liderat me zv. presidentin Mike Pence dhe investitorin Peter Thiel përkrah, duke e hapur mbledhjen me shefat e Google, Microsoft, Apple, dhe Amazon.
“Ju kam mbledhur këtu për t’u dhënë ndihmën time. E kuptoj që jeni duke bërë gjëra të mira, dhe më pëlqen shumë kjo ‘kthesë’ për mirë që ka marrë fusha e teknologjisë. Të gjithë po flasin për këtë kthim që po bën industria. Kështu që të gjithë në këtë dhomë duhet të më pëlqejnë mua, sado pak,” tha Trump, duke marrë parasysh mbështetjen e vogël që mori nga kompanitë teknologjike.
“Do vazhdojmë me këtë kthesë. Më e rëndësishmja, ne duam që ju të vazhdoni me novacionet tuaja të mrekullueshme. Nuk ka asnjë tjetër në botë si ju. Nuk ka asnjë tjetër si ju në këtë dhomë, dhe ne (qeveria amerikane) do të jemi mbrapa çdo hapi që ju merrni. Mund të merrni në telefon njerëzit tim, mund të më merrni dhe mua madje, direkt. Ne këtu nuk do të kemi një ‘zinxhir komande’”, vazhdoi Trump.
Temat që u diskutuan në këtë mbledhje ishin tregtia e lirë, siguria kibernitike, dhe krijimi i punëve.
Personat që morën pjesë ishin Eric Schmidt dhe Larry Page i Google, Tim Cook i Apple, Satya Nadella dhe Brad Smith i Microsoft, Jeff Bezos i Amazon, Safra Catz i Oracle, Chuck Robbins i Cisco, dhe Sheryl Sandberg e Facebook.
Duhet theksuar dhe ftesa me vonesë që mori shefi i Tesla, Elon Musk, i cili jo vetëm dha para për fushatën e Hillary Clinton, por shumë herë kritikoi Donald Trump në publik.
Por një nga këta ‘gjigandë’ teknologjik që mungoi në këtë mbledhje ishte përfaqësimi i Twitter, rrjeti social i preferuar i Donald Trump. Thuhet se arsyeja pse Twitter nuk u ftua ishte sepse “ata nuk janë aq të mëdhenj”.
Megjithatë sipas burimeve të Reuters thuhet se Trump nuk e ka ftuar zotin Dorsey pasi ai nuk ra dakord për ti bërë reklamë kompanisë së tij, më herët gjatë muajit Tetor.
Në këtë mbledhje nuk munguan dhe kritikat ndaj administratës Obama, që Peter Thiel e kritikoi duke thënë:
“Në vënd që të shkomim në Mars, pushtuam Lindjen e Mesme”./TechSot.Al/
