Pas dyshimeve të ngritura nga emisionin Investigativ “Stop” në Televizionin Klan se në vend tregtohen kikirikë me origjinë nga Kina që kanë përmbajtje të lartë të aflatoksinës , shqetësim ky i ngritur edhe në vende të tjera, ka reaguar Autoriteti Kombëtar i Ushqimit.
AKU bën të ditur për Tv Klan se ka bërë bllokimin paraprak të të gjithë sasisë së kikirikëve në vend që kanë prejardhje nga Kina, deri në marrjen e një përgjigje nga Instituti i Sigurisë Ushqimore dhe Veterinare, i cili po kryen analizat për të parë nivelin e aflatoksines.
Kjo do të thotë se nga e mërkura asnjë tregtar që ka në magazinë apo në dyqane kikirikë me origjinë nga Kina, nuk lejohet t’i tregtojnë për konsumatorët.
Në vëzhgimin e bërë nga emisioni “Stop”, rezultoi se tregu shqiptar është i dominuar nga kikirikët kinezë, të cilët blihen shumë nga konsumatori , madje në to mungon edhe data e skadencës.
Pak ditë më parë Kroacia vendosi tërheqjen nga tregu të kikirikëve që vinin nga Kina. Kjo pasi analizat treguan nivele të rrezikshme të aflatoksinës në një sasi prej 9,2 mikrogramë për kilogram.
Alarmi nuk vjen vetëm nga Kroacia, por edhe mediat italiane shkruajnë për një “listë të zezë” të produkteve të kontaminuara me aflatoksinë, që nga lajthitë, frutat e thata nga Turqia, xhinxherët dhe kikirikët nga Kina apo fistekët nga Irani.
