Ministri i Brendshëm, nga Universiteti Bujqësor ku inspektoi prishjen e disa ndërtesave pa leje deklaroi edhe një herë se kjo qeveri është e vendosur për të reformuar drejtësinë dhe konkretisht për të vënë në zbatim ligjin e Vetingut. Ai u shprhtha se disa gjyqtarë ishin bërë gati të merrnin vendim për të siguruar këto objekte të paligjshme. Sepse, tashmë të kthyer në një praktikë klienteliste dhe korruptive të konsoliduar, sa herë gjendemi përpara një ndërtimi pa leje, pavarësisht dimensioneve të çudisë dhe paligjshmërisë, gjenden gjithmonë disa gjyqtarë, të cilët kanë bërë zakon shkeljen e ligjit për shkak të parasë, të marrin në mbrojtje ndërtimet pa leje dhe të ndalojnë institucionet të bëjnë detyrën.
Ndaj e theksoj, kjo është Shqipëria e sistemit të drejtësisë së korruptuar që duam të pastrojmë, dhe përpjekja jonë për të ndërtuar sistemin e drejtësisë që i shërben ligjit dhe i shërben interesit publik, i shërben qytetarëve.
Nga njëra anë institucionet, siç e shihni dhe ju këtu, janë të angazhuara të bëjnë maksimalisht punën për t’i dhënë, – siç në rastin konkret studentëve apo qytetarëve, – hapësirat publike që meritojnë dhe që iu janë mohuar për më shumë se dy dekada.
Nga ana tjetër ne jemi të vendosur të vazhdojmë me më shumë forcë se sa deri dje të gjithë procedurën e reformimit të sistemit të drejtësisë.
Vetting-u është një hap që nuk ka kthim pas, pavarësisht rezistencës së të gjithë atyre që në ‘Frontin e të Keqes’ nuk duan që në këtë vend të ketë drejtësi për qytetarët, për fëmijët tanë dhe një Shqipëri më të drejtë e më të denjë.
Ne jemi shumë të vendosur dhe këto janë shenja të njëpasnjëshme për të bërë atë për të cilën na kanë besuar qytetarët.
Jo të gjitha i kemi bërë, por po punojmë ditë për ditë për të kapur atë që kemi humbur, atë që kemi lënë pas gjatë dy dekadave të kaluara dhe për të ndërtuar Shqipërinë e të ardhmes”.
