Edi Smalaj, shefi i Kardiologjisë në spitalin e Shkodrës ka folur për arrestimin e tij nga policia dhe akuzat për falsifikim të kartelës mjekësore. Ai tha se arrestimi ishte me prapavijë politike. Kardiologu u vu në pranga disa ditë më parë, por më pas gjykata i caktoi masën detyrim paraqitje. Sipas policisë mjeku ka shtruar në spital pedagogun e akuzuar për korrupsion Simon Lufi. Policia ka dyshime se ky veprim është bërë për ta shpëtuar nga burgu profesorin.
Por në deklaratën e tij të parë, pas ngjarjes, mjeku thotë: “Unë jam akuzuar padrejtësisht, denoncimi është bërë nga drejtori i spitalit, por gjykata e vërtetoi të kundërtën. Arrestimi im kishte prapavijë politike, me qëllim prishjen e imazhit”.
Mjekët e spitalit të Shkodrës dolën sërish në protestë sot. Ata kërkojnë që anulohet ligji që parashikon dënimin e mjekëve për gabimet mjekësore.
Sipas tyre protesta nuk është një mbrojtje të interesave individuale, po një kundërshtim të fenomeneve negative që mund të vijnë nëse gabimet mjekësore konsiderohen vepër penale si dhe u bëjnë thirrje të gjithë mjekëve në vend të dalin në protesta.
