Berlusconi i tërheq veshin Montelës për Suso-n

Milan-i vijon momentin pozitiv dhe ngushton në -4 pikë diferencën me Juventusin kryesues (33 pikë) që frenoi përballë Genoas (3-1). Fitoja 1-4 e kuqezinjve në transfertën e Empoli-t risolli buzëqeshjen e Silvio Berlusconi-t, i cili gjithsesi nuk harron t’i japë ndonjë “këshillë” trajnerit Vincenzo Montella. I intervistuar nga mikrofonat e “Mediaset Premium”, Berlusconi shpjegon se si do ta donte Milani-n e tij: “Suso më kujton Donadoni-n. Ka shumë klas, tejkalon një apo dy kundërshtarë dhe më pas godet në portë. Tani luan më shumë në krahë dhe duhet të bëjë më shumë krose, por unë e shikoj më tepër si një sulmues të dytë për të shfrytëzuar gjuajtjen e tij të fortë. Është një nga pikat për të cilat shpeshherë unë dhe Montella “zihemi”. Unë do ta vendosja Milani-n gjithmonë me dy sulmues dhe një lojtar krahu: pra Suso është një puntë e parë me Bonaventura-n pas krahëve, kështu mund të marrim rezultate të mëdha”, u shpreh presidenti kuqezi.

Nuk kanë munguar fjalët pozitive për Montella-n që javë pas jave po tregon se është i duhuri për rikthimin e Milani-t të madh: “Duhet t’i bëj komplimente trajnerit, di ta mbajë shumë mirë grupin. Është shpejt për një gjykim përfundimtar, por është në rrugën e duhur. Besoj se duke vazhduar kështu, Milan-i mund të sigurojë pjesëmarrjen në Champion-s të cilit ia ndjej mungesën e të ardhurave në arkën e klubit…(qesh)”.

Protagonisti i madh i mbrëmjes kuqezi ishte Gianluca Lapadula (2 gola ndaj Empoli-t), i sponsorizuar nga vetë Berlusconi gjatë merkatos së kaluar: “Kisha parë disa nga golat e tij në Serie B dhe kam bindjen se kur dikush ka talentin e tij për të finalizuar, shënon 30 gola në serinë inferiore mund të jetë produktiv edhe në Serie A. Lufton për çdo top dhe në momentin e duhur di të shënjestrojë portën”.

Ndërkohë ambicjet janë të tjera, Berlusconi kërkon të rrëmbejë edhe nje trofe të fundit gjatë presidencës së tij: “Dua të jem në Doha për të ngritur atë që do të ishte trofeu numër 29 i 30 viteve të mi president, do t’i ndezim qirinjtë atij që i takon”. Dhe në këtë pikë Juventus-i është i paralajmëruar… Më 23 dhjetor “Zonja e Vjetër” dhe “Djalli” do të sfidojnë forcat për të vendosur se cili do të jetë fituesi i Superkupës së Italisë.