Tashmë që Donald Trump do të drejtojë Amerikën të gjithë kanë hapur arkivat për të gërmuar se çfarë ai kishte deklaruar më parë për Shqipërinë dhe Kosovën.
Në këtë linjë, gazeta shqiptare “Illyria” që botohet në SHBA ka publikuar një korespondencë të Presidentit të gazetës, me Donald Trumpin në vitin 2011.
Presidenti i sapozgjedhur amerikan, Donald Trump ka qenë i ftuar në festën e 20-vjetorit të themelimit të gazetës “Illyria”, në New York.
Dita e festës korrespondonte në të njëjtën datë me atë të finales së shfaqjes televizive “The Apprentice”, e cila e bëri të famshëm në të gjithë Amerikën, bosin e pronave të patundshme njujorkeze.
“I dashur Vehbi, të falenderoj që më ke ftuar”, i drejtohet ai me një letër personale botuesit të gazetës shqiptaro-amerikane “Illyria”. “E vlerësoj shumë ftesën dhe më bëhet qejfi nga gjesti juaj për të më nderuar me një çmim”.
“Kam dëgjuar vetëm gjëra të mira për Shqipërinë, sidomos që është një vend shumë i bukur”, thotë presidenti i ardhshëm i Amerikës. “më vjen keq që nuk do të kem mundësinë që t’ju bashkohem për një ngjarje kaq të shënuar…”, shkruante Trump më 22 maj, 2011.
