Humbja 3-0 ndaj Izraelit në “Elbasan Arena” është pritur shumë keq nga tifozët e kombëtares shqiptare. Përveç tre golave të pësuar, ata u inatosën nga fakti se gjyqtari Deniz Aytekin penalizoi me dy penallti dhe po kaq kartonë të kuq përfaqësuesen kuqezi në mbrëmjen e së shtunës. Kështu, të xhindosur me vendimet fatale të turko-gjermanit, ende pa përfunduar ndeshja, tifozët “pushtuan” faqen e tij në rrjetin social “Facebook” duke shkruar ofendime nga më të ndryshmet. Gjyqtari nuk i ktheu përgjigje askujt dhe e fshiu faqen (ose e çaktivizoi përkohësisht) dhe “u zhduk”.
Inati i tifozerisë shqiptare nuk u mbyll me aq, sepse brenda pak orësh u gjetën mënyra të tjera për të cenuar gjyqtarin. Dikush redaktoi faqen me emrin e tij në “Wikipedia” duke shkruar fjali shumë të rënda, ndërsa të tjerë i hapën një faqe false në “Facebook“, administratori i së cilës bëri pafund komente me shenjën e kartonit të kuq në shenjë proteste. Për tifozët, arsyeja kryesore pse Shqipëria u mposht nga izraelitët është dashakeqësia e gjyqtarit, i cili la skuadrën e teknikut Gianni De Biasi me nëntë lojtarë, pasi largoi me të kuqe mbrojtësin Berat Djimsiti dhe portierin Etrit Berisha.
