Mbrëmjen e së mërkurës, Policia e Kavajës arrestoi një 69 vjeçar, si të dyshuar për vepra të turpshme me një vajzë të mitur që e kishte marrë me mashtrim në banesë.
Burime nga Policia thanë dje se i moshuari e ka futur vajzën e mitur në shtëpinë e tij dhe aty dyshohet të ketë kryer vepra të turpshme me të.
Në momentin kur ai e ka thirrur vajzën, duke i thënë se do ta qeraste me ëmbëlsira, pranë saj kanë qenë edhe disa fëmijë të tjerë, të cilët i kanë treguar babait të saj.
Policia tha se Shtetasi Lik Çaça dhe është denoncuar nga babai i 10 vjeçares.
Çaça ka qenë vetëm në shtëpi në momentin që ka futur brenda vajzën e mitur dhe për këtë arsye ka dyshime se ai mund ta ketë ngacmuar atë seksualisht, nisur edhe nga deklarimet e babait të saj. Ai, sapo ka mësuar nga fëmijët e tjerë, për veprimin e të moshuarit, ka nxituar të lajmërojë Policinë, në mënyrë që autori të kapej në flagrancë.
Burimet thanë se në shtëpinë e Çaçës kanë shkuar menjëherë shërbimet e Komisariatit të Kavajës, që janë futur brenda dhe kanë kryer arrestimin e 69 vjeçarit.
Ndërsa vajza është marrë nga familjarët e saj dhe në prezencë të tyre e të një psikologeje është pyetur se çfarë veprimesh kishte kryer me të i moshuari.
Mësohet se vajza nuk ka pohuar asgjë, por ka filluar të qajë, veprim që ka shtuar dyshimet rreth pretendimeve të babait të saj.
Nga ana tjetër, 69 vjeçari i arrestuar ka mohuar kategorikisht që të kishte ngacmuar në ndonjë formë seksuale vajzën e mitur, madje duke këmbëngulur që nuk e ka prekur, vetëm e ka puthur në faqe, fakt që e ka konfirmuar edhe vajza.
