Dy trafikantë shqiptarë droge janë dënuar nga një gjykatë në Angli me 10 vjet heqje lirie.
Resul Rahova, i cili përplasi qëllimisht makinën e policisë në përpjekje për t’i shpëtuar kësaj të fundit, është dënuar me 6 vite burg, pasi u shpall fajtor nga gjykata e Southwark Crown.
22 – vjeçari Resul Rahova u shpall fajtor për akuzat e tentativë për shpërndaje kokaine me vlerë rreth gjysmë million paund dhe drejtim të rrezikshëm të mjetit.
Atij iu hoq gjithashtu e drejta për t’i dhënë makinës për 3 vjet, pasi kishte 6 pikë në patentë dhe do t’i duhet që në të ardhmen të bëjë një kurs të gjatë për ta rimarrë sërish atë. Mbi Rahovën rëndonin edhe dy akuza të tjera, të cilat u hodhën poshtë për shkak të mungesës së provave.
Ndërkohë, për bashkëpunëtorin e tij, Bashkim Gurguri nga Garden City, Edgware, Barnet, 46 – vjeç, u dënua me 4 vite burg, pasi u shpall fajtor për tentativë për shpërndarje të kokainës.
Të dy shqiptarët u dërguan në burg më 14 Tetor, ndërsa dënimi iu dha më 3 Tetor.
Ngjarja:
Policia ra në gjurmët e Rahovës dhe Gurgurit më 1 Gusht, kur rreth orës 16:00, në Manns Road, Barnet, Gurguri u pa duke lëvizur një çantë të madhe nga një Mazda që drejtohej nga Rahova.
Një oficer policie u përpoq që ta ndalonte mjetin teksa po largohej, por në këtë moment, Rahova i dha gaz makinës duke shkuar në drejtim të grupit të oficerëve që ndodheshin në rrugë.
Fatmirësisht ata ia dolën që të largoheshin në kohë nga rruga duke shpëtuar të palënduar. Rahova më pas u largua dhe në përpjekje për t’i shpëtuar policisë, ai përplasi një automjet të saj, që qëndronte në fillim të rrugës. Oficerët e ndoqën Rahovën nga pas, por pa mundur që ta kapnin.
Ndërkohë, Gurguri u arrestua në vendngjarje dhe pas kontrollit atij iu gjetën 11 pako drogë të klasit A, vlera e së cilës shkonte në 456,500 paundë.
5 minuta më vonë, Mazda u gjet e braktisur. Gjatë kontrollit, brenda saj u gjendën disa sende dhe një telefon celular.
Një javë më vonë, hetimet çuan në zbulimin e vendndodhjes së Rahovës në një adresë në Twickenham. Edhe në këtë rast, ai u përpoq që t’i ikte oficerëve të policisë, të cilët u detyruan ta gjëmonin nga pas teksa shqiptari ia mbathi nga kopshti pas shtëpisë. Gjatë kësaj kohe ai goditi një oficer policie.
Sarah Orange, nga Met Central Task Force tha: “Këta ishin dy persona të rrezikshëm që kishin qëllim t’i iknin policisë me çdo kusht dhe që nuk treguan asnjë kujdes për jetën e të tjerëve. Fatmirësisht asnjë qytetar dhe oficer policie nuk u lënduan si pasojë e veprimeve të tyre. Sasia e drogës që ata po përpiqeshin të shpërndanin ishte 11 kilogramë, rreth gjysmë million paund dhe mbi 1 milion nëse shitej në rrugë. Të dy kanë marrë dënime dëmethënëse, që reflekton seriozitetin e veprave që kanë kryer”./tvklan.al
