Ish-futbollisti dhe ish-trajneri i Vllaznisë, Esat Rakiqi ka ndërruar jetë në moshën 73-vjeçare në Shtetet e Bashkuara, ku ishte zhvendosur së fundmi për të qëndruar pranë së bijës së tij që jeton atje. Rakiqi vuante prej kohësh nga një sëmundje e rëndë dhe lajmin e vdekjes e konfirmojnë edhe miqtë dhe kolegët e tij, Ramazan Rragami dhe Selami Dani.
Esati e nisi karrierën si futbollist në moshë të hershme dhe pas tërheqjes nga futbolli i luajtur iu përkushtua trajnimit, profesion që e kreu për 33 vite me radhë. Përmes faqes zyrtare, Klubi i Vllaznisë shpreh ngushëllimet për humbjen e tij, ndërkohë që trupi i të ndjerit pritet të mbërrijë në Shkodër në ditët në vijim.
FSHF dhe në veçanti presidenti Armando Duka ka ngushëlluar përmes një postim në faqen zyrtare të Federatës.
Me dhimbje të thellë mësova për humbjen e një personaliteti të futbollit shqiptar dhe në veçanti të atij shkodran Esat Rakiqit. Në emër të Federatës Shqiptare të Futbollit, të të gjithë komunitetit të futbollit shqiptar dhe në emrin tim personal, i dërgoj famijes së të ndjerit ngushëllimet më të sinqerta për humbjen e njeriut të dashur.
Me largimin e Esat Rakiqit nga jeta, futbolli shqiptar humbi një prej specialistëve më të përkushtuar dhe një prej njerëzve më të dashur. Si ish-futbollist i Vllaznisë ai ka dhënë një kontribut të jashtëzakonshëm në zhvillimin dhe sukseset e futbollit në Shkodër. Më pas, ai e ka vijuar punën e tij si trajner, dhe drejtues klubi, duke u vlerësuar gjithmonë për atë që ka dhënë.
Humbja e tij, do të jetë një boshllëk i madh për të gjithë komunitetin e futbollit por kontributi i tij, puna dhe sakrificat për këtë lojë ta dashur do ta bëjnë atë të paharruar për të gjithë ne.
U prehtë në parajsë!
