Ditëlindja e pesëdhjetë e Presidentit të Republikës Bujar Nishani ka përkuar me një vizitë të tijën në shtetin e Illinoisit të SHBA-së.
I shoqëruar nga Zonja e Parë, Odeta Nishani dhe delegacioni zyrtar, Presidenti, siç duket edhe nga foto, u mikprit me shumë ngrohtësi nga bashkatdhetarët shqiptaro-amerikanë të Çikagos në shtetin e Illinoisit.
Ata i dhuruan Presidentit këtë fanellë me ngjyrat kuqezi, ku është shkruar mbiemri i tij dhe numri 50, në shenjë simbolike për ditëlindjen e 50-të tij.
Në fillim Presidenti dhe Zonja e Parë takuan një nga një drejtuesit dhe anëtarët e rreth 20 shoqatave atdhetare, kulturore dhe shoqërore të shqiptarëve në mbarë shtetin e Ilinoisit, drejtuesit e komuniteteve fetare, të cilët i mikpritën duke u shprehur nevojën që edhe në Çikago të hapet një konsullatë e Republikës së Shqipërisë.
Duke iu drejtuar të pranishmëve dhe përmes tyre mbarë komunitetit shqiptaro-amerikan të Ilinoisit, Presidenti Nishani theksoi se: “qëllimi kryesor i vizitës në Çikago ishte pikërisht ky takim me ta, për të parë, ndjerë dhe prekur nga afër një komunitet kaq të mrekullueshëm”.
