Prokuroria në Maqedoni është duke hetuar tre drejtues të lartë në Drejtorinë për Siguri dhe Kundërzbulim dhe një person nga Ministria e Brendshme pasi dyshohet se i kanë shkaktuar buxhetit një dëm prej 862.045 euro.
Bëhet fjalë për fondin e pajisjeve kryer përmes firmës “Finzi Dooel- Shkup’, pronësi e Kosta Kërpaç.
Prokurorja Fatime Fetai deklaroi se bëhet fjalë për dëm ndaj buxhetit të Republikës së Maqedonisë me vlerë 862.045 eurove. Ky furnizim i pajisjeve për nevoja të Ministrisë së Brendshme ka filluar në vitin 2010.
“Ekzistojnë dyshime të bazuara se përmes keqpërdorimit të pozitave, funksionarët e kanë shfrytëzuar funksionin e tyre për pasurim personal dhe për përfitim të të mirave pronësore”, tha prokurorja e PSP-së Fatime Fetai.
PSP-ja njoftoi se gjatë ditës së sotme do të kërkojë nga gjykata masa të posaçme për personat e dyshuar.
