Sot në orën 19:00, në stadiumin “Elbasan Arena” luhet derbi i kryeqytetit ndërmjet Partizanit dhe Tiranës, vitrina e futbollit shqiptar, një sfidë ku në fushë do të zbresin 39 tituj kampionë. Tirana vjen pas tre barazimesh radhazi, por loja e mirë e zhvilluar i ngroh bardheblutë se mund të dalin me fitore nga kjo përballje. Nga ana tjetër, të kuqtë përdorin edhe ironinë, teksa e shohin si ndeshje të radhës duke parë se statistikat flasin për ta. Në 10 derbet e fundit, Tirana ka fituar vetëm një, pesë kanë përfunduar në barazim dhe katër i kanë fituar të kuqtë. Nuk kishte ndodhur asnjëherë që një ekip të kalonte kaq gjatë pa sukses në derbi, megjithatë në kampin bardheblu garantojnë se ka ardhur momenti për t’i thyer “demat e kuq”.
Për kapitenin e Tiranës, Erando Karabeci, kjo është një ndeshje ku duhet luftuar për të fituar, teksa mbrojtësi i të kuqve, Gëzim Krasniqi, me besimin më të madh, thotë se ky takim vlen tri pikë dhe këto shkojnë për Partizanin, pa dyshimin më të vogël. Në “Elbasan Arena” pritet një numër i konsiderueshëm tifozësh, duke parë interesin e shumtë të tyre. Si gjithmonë, edhe në këtë derbi prej tyre priten koreografi speciale, pasi janë ato që i japin lezet kësaj loje magjike. Duke parë incidentet e fundit në derbi, për sigurinë do të angazhohen 300 punonjës policie, nga Drejtoria Vendore e Policisë Elbasan, komisariatet vartëse të saj dhe FNSH-ja. Policia u ka bërë thirrje tifozëve të mos marrin me vete sende të forta, shishe, fishekzjarrë, monedha, metale apo çelësa të ndryshëm. Në të kundërt, nuk do të lejohen të futen në stadium. /telesport
