Biznesmeni libanezo-amerikan, Fadi Mitri që u sulmua me shkop bejsbolli pak ditë më parë në Tiranë ka vendosur të tërhiqet nga investimi i që do të bënte në Gjirin e Lalzit.
Omnix Albania, kompania që do të investonte 450 milionë euro njoftoi sot zyrtarisht largimin nga Shqipëria. Dhe shkaku është i qartë presioni që u ushtrua ndaj administratorit duke e dhunuar rëndë atë dhe duke i kërkuar të largohet sa më shpejt.
“Ky akt i rëndë kriminal ja ka dalë që të rrënojë përpjekjet e Omnix Albania për ndërtimin e një kompleksi turistik prej 450 milion USD në Lalëz”, thuhet në deklaratën e kompanisë.
Projekti turistik i miratuar vetëm dy muaj më parë në Këshillin Kombëtar të Territorit parashikonte ndërtimin e një resorti gjigant, që do të punësonte rreth 1200 veta deri në vitin 2018.
Sipas Omnix, projekti e shndërronte Shqipërinë në një nga destinacionet kryesore turistike në Ballkan dhe do të kontribuonte në rritjen ekonomike të vendit.
Por dhjetë ditë më parë, disa persona dhunuan fizikisht presidentin e Omnix Fadi Mitri. Policia ka arrestuar një prej autorëve dhe ka shpallur në kërkim dy të tjerë, ndërkohë që motivi i sulmit dyshohet se ka lidhje pikërisht me investimin e kompanisë në Lalëz.
“Omnix Albania dënon ashpër këtë ngjarje të rëndë kriminale, e cila sjellë indinjatë për çdo shqiptar. Duke filluar nga sot Omnix tërhiqet nga çdo investim në Republikën e Shqipërisë”, sqaron deklarata.
