Opinion.al, do të sjellë çdo fundjavë një përmbledhje të ngjarjeve kryesore që prekën aktualitetin në vend. Në një hark kohor nga e enjtja në të enjte, ne do të paraqesim në mënyrë të përmbledhur zhvillimet e fundit dhe më të nxehtat e një jave në Shqipëri. Dhuna ndaj biznesmenit libanez, zgjedhjet në Dibër, protestat e maturantëve për të drejtat e shkollimit apo dhe sherrri banal mes dy rreperëve Noizy e Cosman kanë qenë disa prej ngjareve që morën vëmendje të lartë publike gjatë javës që lamë.
Dhuna ndaj biznesmenit libanez
Të shtunën e 10 shtatorit, biznesmeni Faad Mitri është dhunuar në kryqezimin e Laknasit me rrugën e Rinasit, teksa udhëtonte së bashku më shtetasin E.M me makinën e tyre tip “Mitsubishi.
Fillimisht ata u përplasen nga një tjetër automjet tip “Volkswagen” ku gjendeshin 3 persona, të cilët më pas kanë dalë nga makina e tyre dhe kanë dhunuar biznesmenin duke përdorur madje edhe një shkop bejzbolli.
Policia ka identifikuar autorët e ngjarjes, ndërsa mësohet se biznesmeni libanez është dhunuar pikërisht për shkak të një investimi gjigand që ai po realizon për një resort në Gjirin e Lalzit. Mendohet se agresorët i kanë kërkuar biznesmenit të largohet nga Shqipëria.
Zgjedhjet në Dibër
Kandidati i majtë Muharrem Rama është Kryebashkiaku i ri i Dibrës, pas zgjedhjeve të 11 shtatorit. Ai ka fituar me më shumë se 4 mijë vota përballë kandidattit të djathtë Sherefedin Shehu. Ndërkohë, Partia Demokratike në mënyrë të vazhdueshme ka denoncuar vjedhjen e votës në këtë proces, që sipas kryetarit Lulzim Basha nxori fitues kartelin e drogës dhe korrupsionit.
Në ditët që pasuan nxjerrjen e rezultatit zyrtar mediat dhe emisionet investigative, e veçanërisht emisioni “Stop” në TV Klan, gjithashtu kanë denoncuar raste të shitjes së votës, për 2 mijë lekë të reja.
Zgjedhjet lokale për bashkinë e Dibrës, u zhvilluan pas lënies në mes të mandatit nga ish-kryetari Shukri Xhelili, pas përfshirjes së këtij të fundit në një skandal seksual.
Abuzimi seksual me te mituren
Nëna e një vajze 12 vjeçare dhe bashkëjetuesi i saj janë arrestuar nga policia e Fierit, nën akuzën e abuzimit seksual me vajzën e mitur. Ngjarja e rëndë ka ndodhur në fshatin Mbyet të Fierit, ku janë ndaluar 52 vjeçari Ilmi Hioxhaj dhe bashkëjetuesja e tij 40-vjeçare Selvie Yzeiraj.
Prej më shumë se gjashtë vjetësh, njerku abuzonte seksualisht me vajzën e mitur ndërkohë që e ëma në dijeni të ngjarjes, jo vetëm që nuk e ka denoncuar, por e ka pranuar atë në heshtje.
Nga dëshmitë e vajzës në prani të psikologëve, e ëma ka qenë dëshmitare e skenave seksuale të njerkut me të miturën dhe nuk ka reaguar.
Në fillim Selvie Yzeirja e ka mohuar këtë fakt, por më pas ajo e ka pranuar abuzimin, duke shtuar se ka heshtur për të mos i hapur fjalë vajzës në fshat.
Gjithashtu të dy bashkëjetuesit në bashkëpunim kanë kultivuar kanabis dhe 21 bime iu gjetën të mbjella në oborrin e shtëpisë.
Rama dhe protesta e maturantëve
Dita e martë ka shënuar edhe nisjen e regjistrimit në Universitete për maturantët fitues, ndërkohë që shumë prej atyre të mbetur poshtë vijës së kuqe kanë vijuar protestat përpara Kryeministrisë, duke kërkuar rishikimin e procedurave në fazën e dytë të regjistrimit.
Paralelisht me protestën ku nuk kanë munguar tollombacet me bojë në drejtim të godinës së Kryeministrisë, kreu i qeverisë ka zgjedhur të zhvillojë një takim me 150 maturantët më të mirë të Shqipërisë, ku sipas tij, më të paktët kanë fituar të paktën në 4 degë.
Në fjalën e tij, Kryeministri Rama është ndalur tek të mirat që ka sjellë reforma në arsim, duke mos marrë kështu parasysh, ankesat e qindra maturantëve të mbetur në udhëkqryq.
Por edhe pse Kryeministri ka lavdëruar fituesit, që sipas tij kanë qenë më të mirët, duket se edhe midis maturantëve ekselentë ka patur të penalizuar, që nuk kanë shkuar aty ku ata kanë dëshiruar.
Noizy dhe Cosman
Një përleshje e armatosur mes dy reperesh të njohur ka nodhur pasditen e 13 Shtatorit në mes të Prishtinës, përballë njërit nga hotelet e njohura të këtij qyteti. Si pasojë e përplasjes në të cilën janë përfshirë Noizy dhe Cosman, me grupet e tyre përkatëse OTR dhe Babastars, ka mbetur i palgosur reperi Noizy dhe një shok i tij.
Policia ka ndaluar Cosmanin, i cili sikurse bëhet me dije është lënë i lire pas 48 orësh. Nuk janë të qarta arsyet që kanë çuar sherrin deri në përplasje me armë, ndonëse mendohet se motivi i tij lidhet me disa deklarata të Noizyt mbi reperin rival./ Opinion.al, M.B
