Zhoze Murinjo ka pranuar se ishte e vështirë ta bindte Pol Pogbanë të rikthehej te Mançester Junajtidi nga Juventusi për shumën rekord 110 milionë euro.
Sipas trajnerit, “Djajtë e Kuq” hasën në konkurrencën e “një tjetër klubi të madh” para se të bënin transferimin më të shtrenjtë në historinë e futbollit. Për mesfushorin francez u interesua edhe Reali i Madridit, por spanjollët u tërhoqën përballë ofertës faraonike të Junajtidit.
“Ishte e vështirë ta bindnim. Me Pogbanë pata shumë biseda dhe SMS të shkëmbyera. Mendoj se ai merrte një mesazh nga trajneri i një tjetër klubi të madh në mëngjes dhe një tjetër nga unë pasdite. M’u desh të përpiqesha fort për ta bindur të na zgjidhte ne në vend të të tjerëve”, rrëfeu Murinjo për “Goal.com”. Sipas 53 vjeçarit, fakti që Mançester Junajtidi nuk merr pjesë në Ligën e Kampioneve këtë sezon është humbje si për skuadrën e tij ashtu edhe për Championsin: “Championsi nuk është Champions pa Junajtidin dhe Junajtidi nuk është Junajtid pa Championsin. Por për t’u rikthyer aty, së pari duhet t’i bëjmë mirë gjërat në Premier Ligë. Hapi i parë është të rikthejmë vetëbesimin, gjë që po e bëjmë”.
