Kur kanë mbetur për t’u numëruar edhe 9 nga 118 kuti votimi, kandidati i ASHE, Muharrem Rama ka marrë 17 207 vota dhe është në avantazh me 3965 vota më shumë se kandidati i së djathtës, Sherefedin Shehu, që ka marrë 13 242.
Me këtë ritëm që po punojnë grupet e numërimit, pritet që procesi të përfundojë rreth orës 22 të mbrëmjes.
Procesi i numërimit rinisi orën 10:50, por u ndërpre rreth orës 12:30 për shkak se në KZAZ gjendej një numër i madh personash. Drejtuesit e qendrës së numërimit kërkuan largimin nga ambientet e brendshme të personave të paautorizuar. Policia largoi këta persona dhe numërimi rinisi normalisht.
Veç vëzhguesve të autorizuar numërimi po monitorohet edhe nga deputetë të të dy palëve, të cilët gjenden në Dibër prej disa ditësh.
Gjatë procesit të votimit një ditë më parë, pati akuza të ndërsjellta nga të dy kampet politike për tentativa për blerje votash.
Partia Demokratike akuzoi qeverinë për blerje votash me para në dorë dhe me thasë me miell.
Disa persona u kapën duke fotografuar votën e tyre. Ata u proceduan penalisht dhe votat u shpallën të pavlefshme.
