U shpall maturantja e dytë më e mirë në Shqipëri, por nuk e fiton Mjekësinë

Fituese e disa Olimpiadave dhe e dyta maturante më e mirë në Shqipëri, A.Zyberi nga Shkodra me lot në sy tregon se nuk arriti dot të fitonte shkollën e dëshiruar. Së bashku me shokun e saj E.Haxhia, janë zgjuar që në 6 të mëngjesit për të ardhur në Tiranë dhe për të kërkuar të drejtat e tyre, duke iu bashkuar protestës së maturantëve përballë Kryeministrisë.

Zyberi tregon se pavarësisht mesatares së saj të ponderuar, 10.17, ajo nuk arriti dot të fitonte degën e dëshiruar. Ndërsa E. Haxhia me mesatare 9.7 nuk fitoi dot asnjë shkollë.

Që në fëmijëri, ëndrra e Zyberit ishte të bëhej një mjeke, por për shkak të sistemit të ri arsimor, kjo ëndërr mori fund. Në shkollën e saj nuk e kishte paralajmëruuar njeri për kriteret që duhej të përmbushte për të fituar degën shumë të dëshiruar.

As institucionet e tjera arsimore në vend nuk kishin publikuar asnjë kriter. Të gjithë i thonin: “Ke fituar medalje ari, nuk ke pse shqetësohesh aq shumë”. Dhe me të drejtë në fakt.

Fundja nëse nuk do e fitonte ajo, maturantja më e mirë në vend, kush tjetër mund ta fitonte atë degë?! “Unë nuk ia dola.

Edhe pse, mesatarja ime e ponderuar 10.17 (llogaritje të reja të ministrisë) e tejkalonte mesataren e kërkuar prej tyre që ishte 8.5. Për çfarë po penalizohem unë? Që mesatarja ime është më e lartë sesa e kërkojnë ata?! Ky është gabimi im?” Po Haxhia? Edhe ai fitues i disa Olimpiadave, u godit rëndë nga sistemi i ri arsimor. Ndryshe nga shoqja e saj, ai nuk fitoi dot asnjë degë. Asnjë! “Nuk arrij ta kuptoj, sesi unë me mesatare 9.7 nuk arrita dot të fitoj asnjë nga 10 degët e përzgjedhura, ndërsa shoku im me mesatare 7.6 arriti të fitonte një degë shumë të mirë këtu në Tiranë.

Ministrja e Arsimit më detyrohet një shpjegim për këtë, kryeministri më detyrohet një shpjegim!”

Dy shokët nga shkolla e Medresesë në Shkodër, janë pjesë e maturantëve që protestuan sot përpara Kryeministrisë. Ata thonë se nuk do ndalen, por do vazhdojnë të protestojnë derisa sistemi i ri arsimor të ndryshojë.Maturantët nga skajet e Shqipërisë u bashkuan për të kërkuar të drejtën e tyre para kryeministrisë.

Të pyetur nga Newsbomb.al me lot në sy dhe çadra në duar tregonin gjimnazin ku kishin studiuar, mesataret e tyre dhe ëndrrat e thyera.Kjo është një listë me nxënës nga gjimnaze të ndryshme, kryesisht nga gjimnazet e Tiranës, por edhe nga Vlora, Elbasani dhe Shkodra, të cilët nuk kanë kapur asnjë degë. /Newsbomb.al

Të paktë kanë qenë ata të cilët kanë fituar një nga degët, zgjedhjen e nëntë ose të dhjetë në listë.