Me kërkesë të Prokurorisë, Gjykata e Fierit ka dhënë masën e sigurisë 20 ditë burg për efektivin e Forcave të Ndërhyrjes së Shpejtë, 42 vjeçarin Maliq Shehaj.
Shehaj u arrestua me akuzën e vrasjes me dashje të mbetur në tentativë, pasi në gjendje të dehur shkrehu armën ndaj kolegëve të tij pasi fillimisht ishte konfliktuar me dy persona.
Në momentin kur për t’i ndarë kanë ndërhyrë tre punonjës policie, dy civilë dhe një me uniformë, Shehaj ka qëlluar me pistoletë.
“Gjatë ndërhyrjes ky shtetas ka nxjerrë një armë tip pistoletë dhe pasi e ka mbushur e ka drejtuar atë ndaj punonjësve të policisë. Në këtë kohë ka bërë dhe shkrepjen e armës por pa shkaktuar dëme, pasi të tre punonjësit e policisë, gjatë ndërhyrjes, e kanë devijuar drejtimin e qitjes”, deklaron Policia.
Por Shehaj pretendon se konflikti me dy personat kishte ardhur pasi i bllokuan rrugën me makinë dhe e kanë qëlluar me shufër hekuri në automjet. Ndërsa për të shtënën me pistoletë, ka deklaruar se ka kryer qitje të pavullnetshme gjatë konfliktit fizik.
