Benet Adili, 13- vjeçari i cili mbeti i plagosur në atentatin e ndodhur në Mynih të Gjermanisë, fatmirësisht është zgjuar nga koma.
Beneti ka kaluar ditë të tëra të rënda në gjendje kome, në spitalin e fëmijëve në Haun. Familja e tij ka vuajtur po kaq ditë për jetën e Benetit. Prindërit e tij Gonxhja dhe Fati kanë qëndruar ditë dhe netë pranë shtratit të të birit, shkruan gazeta gjermane TagesZeitung.
Beneti është një ndër viktimat e sulmit të kryer muajin e kaluar në Mynih, si pasojë e të cilit kanë humbur jetën 9 persona. 13-vjeçari shqiptar nga Kosova Lindore, ka pësuar një lëndim të rëndë në nofull por ka mbijetuar, transmetojnë mediat kosovare.
Ai ndodhej në McDonalds të qendrës tregtare Olympia së bashku me tre shokë të tij, kur atentatori 18-vjeçar gjermano-iranian kishte filluar të shtënat. Ali David Sonboli kishte gjuajtur në mënyrë të qëllimtë edhe në drejtim të kokës së Benetit.
Kur pas katër ditëve, mjekët arritën ta kthejnë djaloshin nga koma, prindërit e tij dhe personeli i treguan se tre shokët që kishin qenë me të kishin vdekur në sulmin e bërë atë ditë.
Benet Adili ka edhe dy vëllezër në moshën 3 dhe 9 vjeçare.
Beneti është njëri ndër 35 personat e plagosur dhe të lënduarit në atentatin e Munihut.
Qyteti ka vendosur që të ndihmojë financiarisht familjet e viktimave dhe të të plagosurve dhe për këtë ka ngritur një fond.Të mërkurën Asambleja e Komunës ka vendour njëzëri që në këtë fond të derdhen 500 mijë euro dhe që, në varësi nga nevojat, shuma e fondit të rritet. Paratë do të shpenzohen, veç tjerash, edhe për trajtimin mjekësor të të plagosurve dhe për shërbimet të cilat nuk i mbulon sigurimi shëndetësor./tvklan.al
